ԵՐԵՎԱՆ, 21 հոկտեմբերի — Sputnik. ՀՀ ՏՄՊՊՀ նախագահ Արտակ Շաբոյանը, մեկնաբանելով վերջին օրերին հայաստանյան շուկայում բենզինի գնի էժանացումը, հայտնեց, որ շուկայում հայտնվել է նոր ներկրող, որն էլ էժան գնով է վաճառում բենզինը:
«Ուսումնասիրությունները պարզել են, որ բենզինի շուկայում ավելացել է ներկրող ընկերությունների թիվը: Շուկայում հայտնվել է նոր ընկերություն՝ «Մաքս Գրուպը», որն ավելի էժան գնով լուրջ խմբաքանակների ձեռքբերումներ է իրականացրել և արդյունքում ավելի էժան վաճառք կատարել ՀՀ-ում: Դրա շնորհիվ բենզինի ընդհանուր գները նվազել են՚,- ասաց Շաբոյանը:
ՏՄՊՊՀ նախագահը հայտնեց, որ նոր ընկերությունը բենզին է ներկրում ՌԴ-ից:
Արտակ Շաբոյանը վստահեցրեց, որ այս շուկայում մուտքի խոչընդոտներ չկան, և ցանկացողը կարող է բենզին ներկրել Հայաստան:
Մինչ այժմ ՀՀ բենզինի շուկան բաժանված էր գերիշխող դիրք ունեցող երկու ընկերությունների՝ «Ֆլեշի» և CPS-ի միջև:
Ի դեպ, շուկայում հայտնված նոր «Մաքս գրուպ» ընկերությունը, ՀՀ կառավարության էլեկտրոնային ռեգիստրի տվյալներով, Հայաստանում իր գործունեությունը սկսել է 2 տարի առաջ՝ 2014թ-ի հուլիսին: Սեփականատերը ՀՀ քաղաքացի Հովհաննես Սուրենի Մարգարյանն է:
Բենզինի միջազգային շուկայում, ի տարբերություն Հայաստանի, այժմ գների բարձրացում է նկատվում: Արտակ Շաբոյանի խոսքով` հայաստանյան շուկայում միջազգային շուկայի փոփոխությունները անուղղակիորեն են ազդում, քանի որ բենզինը Հայաստան է գալիս ռուսական շուկայից, և փոփոխված գնով ձեռք բերված վառելիքը մեր երկիր հասնում է ավելի ուշ:
