ԵՐԵՎԱՆ, 21 հոկտեմբերի — Sputnik. 2017-ի պետական բյուջեն առանց ավելորդ շռայլությունների ծրագիր է, համոզված է տնտեսագետ Վիլեն Խաչատրյանը։
Միաժամանակ, նա նշում է, որ այդ նախագիծը որոշ առումներով հստակեցնելու կարիք կա։
Օրինակ, մի տեղ նշվում է, որ զբոսաշրջությունը զարգացնել է պետք, մեկ այլ տեղ ասվում է, որ մինչև 2021 թվականը Հայաստանը պետք է ունենա 5 անգամ ավելի զբոսաշրջիկ՝ 3,6 միլիոն։ Դա այնքան էլ իրատեսական չէ, ավելի հավանականը զբոսաշրջության համար երկիրը գրավիչ դարձնելն է։
Տնտեսագետը մեկ այլ նկատառում էլ ունի. գյուղատնտեսության մասին ոչ թե խնդիրների իրատեսական լուծում է մատնանշված, այլ զուտ հայեցակարգային մոդելներ են ներկայացված։
2017-ի բյուջեով շատ ծախսեր կրճատվում են, ինչն արտաքին պարտքի աճի պայմաններում Վիլեն Խաչատրյանը գովելի քայլ է համարում։
Տնտեսագետը դրական է համարում փաստաթղթային քաշքշուկները կրճատելու նպատակով կատարած փոփոխությունները, քաղաքացու՝ մեկ պատուհանից օգտվելու համակարգի ընդլայնումը, մաքսայինը հարկայինից հստակ տարանջատելուն միտված բարեփոխումները։ Նախատեսվում է, որ ՀՆԱ-ի աճը կկազմի 2,2 տոկոս։
