ԵՐԵՎԱՆ, 20 հոկտեմբերի – Sputnik. ՀՀ փոխվարչապետ Վաչե Գաբրիելյանն այսօր, Sputnik Արմենիայի հետ զրույցում, անդրադառնալով Լևոն Տեր-Պետրոսյանի` արտաբյուջետային ֆինանսավորումը դադարեցնելու մասին առաջարկին, ասաց. «Ես արտաբյուջեի ջատագով չեմ»։
Փոխվարչապետը նաև նշեց, որ կան արտաբյուջեներ, որոնք անհրաժեշտ են, բայց և վստահեցրեց, որ դրանք գոյություն ունեն օրենքով նախատեսված հիմքերով և ծախսերի՝ օրենքով նախատեսված ուղղություններով։
Վաչե Գաբրիելյանը տեղեկացրեց, որ բացառությամբ մի քանիսի, արտաբյուջեները հիմնականում փոքր գումարներ են, և մեծ մասամբ գոյանում են գրանտների հաշվին։
«Արտաբյուջեներից վախենալ պետք չէ, պետք է վախենալ թափանցիկության պակասից»,- ասաց Վաչե Գաբրիելյանը՝ հավելելով, որ հանրությունը պետք է տեղյակ լինի, թե որքան գումար և ինչի համար է ծախսվել։
ՀՀ առաջին նախագահ Լևոն Տեր-Պետրոսյանը երեկ երկու առաջարկ է ներկայացրել ՀՀ վարչապետ Կարեն Կարապետյանին, որոնցից մեկի համաձայն` պետք է վերացնել նախարարությունների, պետական այլևայլ գերատեսչությունների, ինչպես նաև տեղական ինքնակառավարման մարմինների արտաբյուջետային հաշիվներն ու հիմնադրամները։
