ԵՐԵՎԱՆ, 20 հոկտեմբերի — Sputnik. Ահաբեկիչները կրակ են բացել Սիրիայի Հալեպ քաղաքում գտնվող Բուստան ալ Կասր շրջանի մարդասիրական միջանցքի ուղղությամբ։ Այս մասին հայտնում է ՌԻԱ Նովոստին` հղում անելով սեփական թղթակցին։
Բուստան ալ Կասր թաղամասի մոտ առավոտյան ական է պայթել։ Ահաբեկիչները կրակել են նաև հրազենից։ Մարդասիրական միջանցքից մինչև ահաբեկիչների դիրքեր հեռավորությունը մոտավորապես 200 մետր է։
Կաստելո մայրուղու մոտակայքում իրավիճակը հանգիստ է։ Առայժմ տարհանում չի իրականացվում։ Ավտոբուսներն ու շտապօգնության ավտոմեքենաները պատրաստ են գործողություններ սկսել։
Հալեպում հոկտեմբերի 20-ին ժամը 08.00-ից մարդասիրական ընդմիջում է հայտարարվել։ ՌԴ օդատիեզերական ուժերն ու սիրիական բանակը դադարել են կրակել գրոհայինների օբյեկտների ուղղությամբ։ Սիրիական զորքերն այնքան կհեռանան, որ գրոհայինները կարողանան լքել Արևելյան Հալեպը երկու հատուկ միջանցքով։ ՌԴ ԶՈՒ գլխավոր շտաբը հայտնել է, որ միջազգային կազմակերպությունների խնդրանքով մարդասիրական ընդմիջումը կերկարաձգվի ևս երեք ժամով, ինչը թույլ կտա ՄԱԿ-ի և Սիրիական հասարակության Կարմիր կիսալուսնի ներկայացուցիչներին իրականացնել բոլոր միջոցառումները հիվանդներին և տուժածներին, նրանց ուղեկցող անձանց, ինչպես նաև խաղաղ բնակչությանը քաղաքից դուրս հանելու համար։
