ԵՐԵՎԱՆ, 19 հոկտեմբերի — Sputnik, Անի Լիպարիտյան. «Յոթ/Ութ»(«Seven/ Eight Band») խմբի մասնակիցները Հայաստանում առաջին անգամ կնվագեն աշխարհի տարբեր ժողովուրդների մեղեդիները, երևանյան բեմում կհնչեն նաև Սայաթ Նովայի ստեղծագործությունների ինքնատիպ մշակումները։ Խումբն առանձնանում է երաժշտական յուրահատուկ ուղղվածությամբ. նրանք իրենց արվեստում օգտագործում են արևելյան մոտիվներ և արևելքի ժողովրդի գործիքներ։
Խմբի համերգը Երևանում տեղի կունենա հոկտեմբերի 20-ին, Ալ. Սպենդիարյանի անվան օպերայի և բալետի ազգային ակադեմիական թատրոնում։ Համերգի հատուկ հյուրը կլինի դուդուկահար Նորայր Բարսեղյանը և դարբուքի վրա նվագող թուրք վարպետ Միսիրլի Ահմեդը։
7/8 Band խմբի հայտնի երաժիշտ և պերկուսիոնիստ Անդրեյ Տանզյուն Sputnik Արմենիային ասաց, որ սուպեր պրոֆեսիոնալների թիմում նվագելն ամենևին էլ հեշտ չէ։
«Շատ բարդ է, քանի որ բոլորը ստեղծագործող մարդիկ են, և յուրաքանչյուրը ցանկանում է ինքնարտահայտվել։ Սկզբում երկար ժամանակ փորձում էինք հարմարվել միմյանց, հետո որոշակի ձևաչափ գտնվեց։ Տղամարդկանց կոլեկտիվում գրեթե բոլորը առաջնորդներ են, ինչը երբեմն սրում է իրավիճակը», — պատմեց Անդրեյը։
Սակայն, երաժշտի խոսքով, աշխատանքային գործընթացն առանց տարաձայնությունների անհնար է։ Դրանով հանդերձ ընդհանուր գաղափարը բոլորի համար ընդունելի է, դրանով էլ կոլեկտիվը մեկ օրգանիզմ է դառնում։
Համերգի ժամանակ կհնչեն տարբեր ժողովուրդների երաժշտություններ, հիմնականում` արևելյան։
«Այն ամենն, ինչ մենք կատարում ենք, մեզ համար սիրելի է։ Հազվադեպ գործիքներ են բաս-կլառնետը և բաս-սաքսոֆոնը, դհոլները, արաբական դահիրան, դուդուկն ու զուռնան, թեև վերջինները բավականին հայտնի են։ Ունենք նաև առանց լադերի կիթառ», — ասաց Տանզյուն։
Անդրեյը կարծում է, որ կոլեկտիվի երաժշտությունը հագեցած է արևելյան էներգիայով։ Այն որոշակի ուղերձ ունի։ Կոմպոզիցիաները կա՛մ վառ են, կա՛մ քնարական, կա՛մ զգացմունքային։
Երբեմն բենդի հետ մենակատարներ են համագործակցում, սակայն կոլեկտիվի կատարած ժանրը հատուկ պրոֆեսիոնալիզմ է պահանջում, քանի որ ոչ բոլորը կարող են հարմարվել այդպիսի բարդ երաժշտության։
Խմբի պրոդյուսեր Արսեն Դանիելյանը նշեց, որ կոլեկտիվը ուսումնասիրում և կատարում է այնպիսի երաժշտություն, որը նրանց է հոգեհարազատ։ Խմբի երգացանկում կան հայկական մեղեդիներ, մասնավորապես` Սայաթ Նովայի ստեղծագործություններից։ Խմբի կատարումները ունկնդրի համար բացահայտում են տվյալ ժողովրդի մշակույթը։
«Կոլեկտիվի կատարումները ցուցադրում են երաժիշտների աշխարհայացքը։ Նրանց դեպքում երաժշտությունն ունիվերսալ լեզու է։ Նրանք փոխանցում են արևելյան և այլ երաժշտության ոգին տարբեր մեկնաբանություններով», — ասաց Դանիելյանը` շեշտելով, որ նման արտասովոր կոլեկտիվին Հայաստան չբերել պարզապես չէր կարող։
