ԵՐԵՎԱՆ, 17 հոկտեմբերի – Sputnik. ՀՀ ԱԺ փոխնախագահ, ՀԱՊԿ խորհրդարանական վեհաժողովում հայաստանյան պատվիրակության անդամ Էդուարդ Շարմազանովը չբացառեց, որ ՀԱՊԿ գլխավոր քարտուղար կարող է նշանակվել այլ երկրի ներկայացուցիչ։
«Եթե որոշվի, որ այբբենական կարգով պիտի լինի, ապա հաջորդը Արմենիան է, այսինքն` մենք կլինենք»,- ասաց նա։
Շարմազանովը նաև կոչ արեց չգերագնահատել ՀԱՊԿ գլխավոր քարտուղարի ազգային պատկանելությունը։
«Ով էլ լինի, պետք է սպասարկի ոչ թե իր ազգային, պետական շահերը, այլ ՀԱՊԿ-ի կոլեգիալ շահերը»,- ասաց ԱԺ փոխնախագահը։
Sputnik Արմենիայի հարցին, թե ինչն էր պատճառը, որ Երևանում անցկացված ՀԱՊԿ նիստի նախապես հաստատված օրակարգից հանվեց գլխավոր քարտուղարի մասին հարցը, Շարմազանովը պատասխանեց, որ նման որոշում կայացվել է նիստում, որին մասնակցել են միայն անդամ երկրների նախագահները, ուստի այդ հարցի պատասխանը հայտնի է միայն նրանց։
