ԵՐԵՎԱՆ, 17 հոկտեմբերի – Sputnik. ՀՀ վարչապետ Կարեն Կարապետյանը ՀՀԿ-ին և ՀՀ նախագահին է ներկայացրել կառավարության ծրագիրը։ Ինչպես լրագրողներին հայտնեց Էդուարդ Շարմազանովը, ծրագիրը դեռևս նախնական է։ Այն երկու օրվա ընթացքում կլրամշակվի և կներկայացվի ԱԺ-ի հաստատմանը։ Այդուհանդերձ, ծրագրի որոշ առաջնահերթություններ ՀՀԿ խոսնակը բացահայտեց։
Դրանցից առաջինը ՀՀ ներքին և արտաքին անվտանգության ապահովումն է։ Այս թեզն, ըստ Շարմազանովի, վերցված է ՀՀ նախագահի ծրագրից։ Անդրադառնալով ծրագրի տնտեսական հատվածին` ԱԺ փոխնախագահը նշեց, որ թեև այն վեցամսյա գործողություններ է ենթադրում, բայց նաև ապագա ռազմավարություն է ենթադրում՝ առաջիկա ընտրություններում ՀՀԿ հաղթանակի դեպքում։
Ծրագիրը նախատեսում է նաև ներդրումային միջավայրի բարելավմանն ուղղված քայլեր՝ Հայաստանի և սփյուռքի կարողությունների ներդրում ՀՀ տնտեսության զարգացման գործում, ինչպես նաև կրթական ոլորտի բարելավում և գյուղական բնակավայրերի զարգացում։ Շարմազանովը նշեց, որ կառավարության ծրագրի քննարկումն ԱԺ-ում նախատեսվում է ուրբաթ օրը՝ հոկտեմբերի 21-ին, խորհրդարանի արտահերթ նիստում, քանի որ դրա հաստատման վերջնաժամկետը հոկտեմբերի 23-ն է։
Պատասխանելով լրագրողների հարցերին՝ ՀՀԿ խոսնակը հայտնեց, որ կուսակցության նիստին մասնակցել են նաև նախկին վարչապետ Հովիկ Աբրահամյանն ու կապի և տրանսպորտի նախկին նախարար Գագիկ Բեգլարյանը, որոնք, նրա խոսքով, բարձր տրամադրություն են ունեցել։
