ԵՐԵՎԱՆ, 17 հոկտեմբերի — Sputnik. ՀԱՊԿ հավաքական անվտանգության ռազմավարությունը փոխզիջումային փաստաթուղթ է, հայտարարել է ՀԱՊԿ գլխավոր քարտուղար Նիկոլայ Բորդյուժան բելառուսական հեռուստատեսության եթերում։
Երևանում ՀԱՊԿ Հավական անվտանգության խորհուրդն ընդունել է մինչև 2025թ-ի զարգացման ռազմավարությունը։
«Վերջին հաշվով դա մեզ համար աստվածաշունչ է հավաքական անվտանգության ձևավորման տեսանկյունից, այն հարցերի, որոնք մենք ամենից առաջ պետք է պահենք տեսադաշտում, որտեղ մենք պետք է զարգացնենք մեր երկրների անվտանգության ապահովմանն ուղղված ընդհանուր գործունեությունը», — ասել է Բորդյուժան։
«Փաստաթուղթը շատ կարևոր է, այն հայեցակարգային առումով շատ լուրջ է։ Դրա վրա իսկապես շատ են աշխատել»,- հավելեց նա։
«Գուցե մենք այնտեղ չենք ներառել այն ամենն, ինչ ցանկանում էինք, որովհետև այդ փաստաթուղթը մեր երկրների փոխզիջումների արդյունք է այս կամ այն հարցի վերաբերյալ։ Անվտանգության բոլոր հարցերը կապված են երկրի ինքնիշխանության հետ։ Այնուամենայնիվ այդ փաստաթուղթը թույլ է տալիս պատկերացում կազմել այն մասին, թե ինչպես պետք է ձևավորենք մեր երկրների հավաքական անվտանգության համակարգը»,- ասել է Բորդյուժան։
ՀԱՊԿ-ն ստեղծվել է Հավաքական անվտանգության մասին պայմանագրի հիման վրա, որը ստորագրվել է 1992թ-ի մայիսի 15-ին ԱՊՀ անդամ երկրների կողմից։ ՀԱՊԿ կազմի մեջ մտնում են Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։
