ԵՐԵՎԱՆ, 16 հոկտեմբերի — Sputnik. ՀՀ կառավարությունը դեռ հոկտեմբերի 13-ի նիստում Ազգային ժողովին առաջարկել էր արտահերթ նիստ գումարել հոկտեմբերի 17-ին ժամը 12։00-ին։
Կառավարության աշխատակազմի ղեկավար-նախարար Դավիթ Հարությունյանը նիստում տեղեկացրել էր, որ ԱԺ օրակարգում ընդգրկված են մի շարք նախագծեր ու միջազգային պայմանագիր, կան նաև օրենքի նախագծեր, որոնք պետք է քննարկվեն նաև երկրորդ ընթերցմամբ։
Հոկտեմբերի 17-ին ԱԺ արտահերթ նիստ են մտնելու ՀՀ ընտրական օրենսգրքում փոփոխություններ և լրացումներ կատարելու, Արժեթղթերի շուկայի, պետական պաշտոններ զբաղեցնող մարդկանց վարձատրության մասին օրենքի նախագծերում։
Այդ թվում են նաև երկու միջազգային պայմանագրեր. 2016 թվականի մայիսի 19-ին Բրյուսելում ստորագրված` Հայաստանի Հանրապետության և Եվրոպական միության միջև «Հորիզոն-2020. հետազոտությունների և նորարարության շրջանակային ծրագիր (2014-2020)» միության ծրագրին Հայաստանի Հանրապետության մասնակցության մասին» համաձայնագիրը և 2014 թվականի դեկտեմբերի 23-ին Մոսկվայում ստորագրված «Տեղեկատվական ոլորտում հանցավոր գործունեությանը հակազդման հարցերով Հավաքական անվտանգության մասին պայմանագրի կազմակերպության անդամ պետությունների փոխգործակցության մասին» արձանագրությունը։
