ԵՐԵՎԱՆ, 15 հոկտեմբերի — Sputnik. Վարորդներին հորդորում ենք հոկտեմբերի 17-19-ը հատկապես Արցախ, Սյունիք, Լոռի և Տավուշ երթևեկել բացառապես ձմեռային անվադողերով, գրել է «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը Ֆեյսբուքի իր էջում։
Նա նշել է, որ հոկտեմբերի 17-ին Ուրալի տարածքից Հայաստան է ներթափանցելու արկտիկական ճակատ, որը գործելու է մինչև հոկտեմբերի 19-ը ներառյալ: Հոկտեմբերի 17-18-ին, 16-ի հետ համեմատած, Լոռիում, Տավուշում, Սյունիքում և Արցախում օդի ջերմաստիճանը կնվազի 15-20 աստիճանով, իսկ մյուս մարզերում` 8-10 աստիճանով: Ամենացուրտ օրը կլինի ամսի 18-ը:
Հոկտեմբերի 17-19-ին շրջանների զգալի մասում սպասվում են տեղումներ: Լոռիի, Տավուշի, Սյունիքի և Արցախի բոլոր այն բնակավայրերում, որոնք գտնվում են ծովի մակերևույթից 1000մ-ից բարձր բարձրության վրա, սպասվում են ձյան առատ տեղումներ, մառախուղ, ցածր հորիզոնական տեսանելիություն, ճանապարհներին` մերկասառույց:
Արագածոտնի, Կոտայքի և Վայոց Ձորի լեռնային բնակավայրերում, Գեղարքունիքում ձյան տեղումները կլինեն թույլ, իսկ Արարատյան դաշտում և նրա նախալեռնային գոտիներում, Վայոց Ձորի նախալեռներում, ինչպես նաև Երևանում սպասվում է թույլ անձրև:
Միայն Շիրակում այդ ցիկլոնի ազդեցությունը գրեթե չի զգացվի, այստեղ տեղումների հավանականությունը շատ փոքր է: Հոկտեմբերի 20-ից ցիկլոնը կթուլանա, և օդի ջերմաստիճանը կրկին աստիճանաբար կբարձրանա:
