ԵՐԵՎԱՆ, 14 հոկտեմբերի — Sputnik. Երևանում անցկացվում է Եվրասիական գործընկերության միջազգային ֆորումը։ Ֆորումին մասնակցում են ԵՏՄ անդամ երկրների կառավարությունների բարձրաստիճան ներկայացուցիչներ, ինչպես նաև մի շարք երկրների գործարար շրջանակների ներկայացուցիչներ։
Հայաստանի նախագահի աշխատակազմի ղեկավար Արմեն Գևորգյանը փոխանցեց երկրի ղեկավար Սերժ Սարգսյանի ողջույնի խոսքը միջոցառման մասնակիցներին։
«2011 թվականին մեր երկրները Երևանում նախաձեռնեցին միջտարածաշրջանային գործընկերության հայ-ռուսական առաջին ֆորումը, որն այս տարիների ընթացքում ապացուցեց իր պահանջված լինելը, նպաստեց մեր շրջանների ներուժի բացահայտմանը և միջտարածաշրջանային համագործակցության ամուր հիմքեր դրեց։ Կարգավորվել է ՌԴ 70 սուբյեկտների հետ հայկական շրջանների արդյունավետ փոխգործակցությունը, ինչը, համոզված եմ, դեռ վերջը չէ», — ասված է Սարգսյանի խոսքում։
Նախագահը համոզված է, որ հայ-ռուսական միջտարածաշրջանային ֆորումը կարևոր հարթակ է, որը հավաքում է երկրների պետական իշխանությունների, բիզնես և հասարակական շրջանակների ներկայացուցիչներին Հայաստանի և Ռուսաստանի միջև միջտարածաշրջանային համագործակցության զարգացման հեռանկարային ուղղությունների ստեղծման համար։
«Հայ-ռուսական տնտեսական փոխգործակցության օրակարգում ընդգրկված է առևտրատնտեսական կապերի խորացման, ներդրումային կլիմայի բարելավման, համագործակցության, արդյունաբերության, էներգետիկայի, գյուղատնտեսության ընդլայնման հետ կապված հարցերի լայն շրջանակ», — նշված է նախագահի խոսքում։
Սարգսյանի խոսքով` ԵՏՄ-ին երկրի անդամակցությունը որակական նոր մակարդակի բարձրացրեց հայ-ռուսական փոխշահավետ գործընկերությունը։
«Համագործակցության ավանդական շրջաններում փոխգործակցության արդյունավետ ընդլայնումը թույլ կտա բացահայտել Ռուսաստանի շրջանների հետ Հայաստանի գործընկերության բացառիկ ներուժը», — նշված է նախագահի ուղերձում։
ՌԴ տրանսպորտի նախարար Մաքսիմ Սոկոլովն իր հերթին հնչեցրեց Ռուսաստանի Դաշնության նախագահ Վլադիմիր Պուտինի ուղերձը։ Ուղերձում, մասնավորապես, նշվում է, որ Ռուսաստանի և Հայաստանի միջև դաշնակցային հարաբերությունները հիմնվում են ընդհանուր, պատմական և մշակութային հոգևոր արժեքների, ինչպես նաև բարեկամության և բարիդրացիական բազմադարյա ավանդույթների վրա։
«Այս հզոր համախմբող գործոնը ավելի շատ հնարավորություններ է տալիս մեր երկրներին` տնտեսության, արդյունաբերության, առևտրային, ինչպես նաև մարդասիրական, գիտական, կրթական կապերի ընդլայնման ոլորտներում կայուն զարգացման և արդյունավետ համագործակցության համար», — գրված է Պուտինի ուղերձում։
Եվրասիական գործընկերության միջազգային առաջին ֆորումը կոչված է իրական ժամանակի ռեժիմում մշտական հաղորդակցման, քննարկման և համագործակցման համար հարթակ ստեղծել, ինչը կհեշտացնի ԵՏՄ-ի փոխակերպումը «Խելացի տարածաշրջանի» (Smart Region)։
Ֆորումն աջակցում է երկկողմ և բազմակողմանի տնտեսական համագործակցությանը և ԵՏՄ, ԱՊՀ, BRICS հինգ անդամների (Բրազիլիա, Ռուսաստան, Հնդկաստան, Չինաստան, ՀԱՀ), ՇՀԿ, ԵՄ, ԱՄՆ-ի և այլ երկրների միջև բիզնես գործողությունների իրականացմանը։
