ԵՐԵՎԱՆ, 14 հոկտեմբերի — Sputnik, Լաուրա Սարգսյան. Ղարաբաղյան հակամարտության կարգավորմանն ուղղված հայտարարության նախագիծը կհաստատվի ՀԱՊԿ հավաքական անվտանգության խորհրդի նստաշրջանի շրջանակում։ Այս մասին հայտնեց Հայաստանի արտգործնախարար Էդվարդ Նալբանդյանը արտգործնախարարների խորհրդի, պաշտպանության նախարարների խորհրդի և ՀԱՊԿ երկրների քարտուղարների կոմիտեի նիստից առաջ։
Այս հարցը նիստի օրակարգի 20 հարցերից մեկն է։
Նախարարը նշեց, որ ՀԱՊԿ-ում Հայաստանի նախագահության ժամանակահատվածում ջանքեր են գործադրվել ՀԱՊԿ հավաքական անվտանգության համակարգերի կատարելագործման համար, շարունակվել է ՀԱՊԿ ճգնաժամային արձագանքման մեխանիզմների զարգացման ուղղությամբ տարվող աշխատանքը։
«Ուշադրության կենտրոնում են եղել միջազգային ահաբեկչության, ծայրահեղականության, նեոֆաշիզմի դրսևորմանն ու այլատյացությանը հակազդելու հարցերը։ Մշակվել և համաձայնեցվել է մինչև 2025 թվականը ՀԱՊԿ հավաքական անվտանգության զարգացման նախագիծը», —իր ելույթը եզրափակեց Հայաստանի արտգործնախարարը։
Նա ընդգծեց, որ այս ընթացքում պատշաճ ուշադրություն է հատկացվել արտաքին քաղաքական պատկերի կատարելագործմանը, ինչպես նաև ՄԱԿ-ի, ՇՀԿ-ի, ԵԱՀԿ-ի հետ ՀԱՊԿ-ի փոխհարաբերությունների հաջորդական զարգացմանը։ ՀԱՊԿ գործընկերներն ընդհանուր առմամբ դրական են գնահատել Հայաստանի կատարած աշխատանքը։
«Նիստի ժամանակ գնահատական տվեցին բոլոր մասնակիցները, և բոլոր գնահատականներն էլ դրական էին»,- Sputnik Արմենիայի թղթակցի հետ զրույցում ասաց ՀՀ փոխարտգործնախարար Շավարշ Քոչարյանը։ Նա ընդգծեց այս նիստի կարևորությունը` նշելով, որ բոլոր գնահատականներն ու արդյունքները կամփոփվեն Հավաքական անվտանգության խորհրդի առաջիկա գագաթնաժողովից հետո։
Երևանում տեղի կունենա նաև ՀԱՊԿ Հավաքական անվտանգության խորհրդի նստաշրջանը, որը կանցկացնի ՀՀ նախագահ Սերժ Սարգսյանը։ Նստաշրջանի ժամանակ կքննարկվեն ՀԱՊԿ նախկին գագաթնաժողովների որոշումները, ինչպես նաև Կազմակերպությունում նախագահելու ժամանակ Հայաստանի առաջարկած առաջնահերթությունները։ ՀԱՊԿ անդամ պետությունների ղեկավարները նաև Կազմակերպության գլխավոր քարտուղար կընտրեն։
ՀԱՊԿ-ի կազմում են Հայաստանը, Բելառուսը, Ղազախստանը, Ղրղըզստանը, Ռուսաստանն ու Տաջիկստանը։
