ԵՐԵՎԱՆ, 14 հոկտեմբերի — Sputnik. Խոշոր ՃՏՊ-ից հետո Հյուսիսային Օսեթիայի հիվանդանոցներում դեռ 10 մարդ կա, հաղորդում է ՌԻԱ Նովոստին` հղում անելով հանրապետության առողջապահության նախարարության ներկայացուցչին։
«Ստուգված տվյալների համաձայն` հիվանդանոցներ տասը մարդ կա, չորսին վիրահատել են։ Մանկական հիվանդանոցում գտնվում է չորս մարդ, նրանց շարքում` այտի և ստորին կոպի վնասվածքով երեխա, մեկ տուժած` ակնաբուժական հիվանդանոցում, ևս մեկը` կլինիկական հիվանդանոցում»,- ասել է գործակալության զրուցակիցը։
Առողջապահության նախարարության տվյալով` մյուս տուժածներին ցուցաբերվել է անհրաժեշտ բժշկական օգնություն, որից հետո նրանք տեղափոխվել են Բեսլան` ժամանակավոր տեղակայման կենտրոն, որտեղ են գտնվում այն ուղևորները, որոնք բժշկական օգնության կարիք չեն ունեցել։ Հոգեբանական աջակցություն ցուցաբերելու համար մասնագետներ են մեկնել կենտրոն։
Հյուսիսային Օսեթիայում ժամը 04։30-ին խոշոր վթար է տեղի ունեցել. միմյանց են բախվել Մոսկվա-Երևան ուղևորատար ավտոբուսն ու մեքենաներ տեղափոխող բեռնատարը։ Ավտովթարի հետևանքով մահացել է 5 մարդ, 27-ին տեղափոխել են հիվանդանոց։ Տուժածներից չորսը 10-15 տարեկան երեխաներ են։ Նախնական տվյալով` տուժածների մեծ մասը Հայաստանի բնակիչներ են։
