ԵՐԵՎԱՆ, 14 հոկտեմբերի — Sputnik. «Հայոց ցեղասպանությունը քրեականացնող օրինագիծն ընդունելով` Ֆրանսիան վերահաստատեց ժողովրդավարական արժեքների նկատմամբ ունեցած հավատարմությունը»,- Sputnik Արմենիային ասաց Հայաստանի խորհրդարանի փոխխոսնակ Էդուարդ Շարմազանովը։ Նրա խոսքով` մյուս եվրոպական երկրները պետք է հետևեն Ֆրանսիայի օրինակին։
«Այդ որոշումը կրկին ապացուցեց, որ Անկարայի շանտաժի և ժխտման քաղաքականությունը կտապալվի», — ասաց Շարմազանովը։
Միաժամանակ նա համոզված նշեց, որ այլևս չի կրկնվի 2012թ-ի իրավիճակը, երբ Ֆրանսիայի խորհրդարանը նման բանաձև էր ընդունել, իսկ Սահմանադրական դատարանն այն անվավեր էր ճանաչել։
«Կարծում եմ` Ֆրանսիան երկու անգամ նույն գետը չի մտնի», — ասաց նա։
Ֆրանսիայի Սենատը հոկտեմբերի 14-ին կայացած քննարկման և քվեարկության արդյունքում ընդունել է Հայոց ցեղասպանության ժխտումը քրեականացնող օրինագիծը: Օրինագծին կողմ է քվեարկել 156, դեմ` 146 պատգամավոր:
