ԵՐԵՎԱՆ, 14 հոկտեմբերի — Sputnik. Հավաքական անվտանգության պայմանագրի կազմակերպության Հավաքական անվտանգության խորհրդի նստաշրջանի բացման ժամանակ ՀՀ նախագահ Սերժ Սարգսյանը գործընկերների անունից շուտափույթ առողջություն մաղթեց Ղազախստանի նախագահ Նուրսուլթան Նազարբաևին, որն առողջական խնդիրների պատճառով չի կարողացել մասնակցել նստաշրջանին։
«Ղազախստանի Հանրապետության նախագահ Նուրսուլթան Նազարբաևը չկարողացավ ներկա լինել այս նստաշրջանին։ Գործընկերներիս անունից նրան շուտափույթ ապաքինում եմ մաղթում»,- ասաց ՀՀ նախագահը։
Երեքշաբթի Ղազախստանի նախագահի մամուլի ծառայությունը հայտնել էր, որ Նազարբաևը բուժում է ստանում, և այդ պատճառով երկրի նախագահի միջազգային առաջիկա այցերը (այդ թվում՝ Հայաստան ու Ադրբեջան) չեղյալ են հայտարարվել:
Ղազախստանի նախագահ Նուրսուլթան Նազարբաևի դուստրը նախօրեին հայտնել է, որ հայրն իրեն համեմատաբար լավ է զգում։
