ԵՐԵՎԱՆ, 14 հոկտեմբերի — Sputnik. Հայաստանի ներկայացուցիչը ՀԱՊԿ գլխավոր քարտուղարի պաշտոնում Հայաստանին ավելի շատ հոգեբանորեն, քան գործնականում կծառայի, Sputnik Արմենիային ասաց քաղաքագետ Երվանդ Բոզոյանը։
«Հանդիպման հիմնական ինտրիգը ՀԱՊԿ գլխավոր քարտուղարի պաշտոնի հավակնորդն է։ Ժամանակին միջինասիական երկրները կասկած ունեին, որ այդ պաշտոնում հայի նշանակումը լարվածության պատճառ կդառնա։ Այսօր նման հարց չկա, այն դուրս է եկել օրակարգից», — ասաց Բոզոյանը։
Ինչ վերաբերում է նոր գլխավոր քարտուղարի հնարավորություններին, ապա, Բոզոյանի կարծիքով, այդ պաշտոնն ավելի շուտ կունենա մեծ հոգեբանական ազդեցություն, որը դրական կազդի Հայաստանի վրա։
«Սակայն ես չեմ կարծում, որ նա մեծ հնարավորություններ կունենա, այդ կառույցի աշխատանքի վրա զգալի ազդեցություն կթողնի։ Իսկ հոգեբանորեն դա Ադրբեջանի նկատմամբ զսպողական ուժ կունենա», — ասաց Բոզոյանը։
Խոսելով Երևանում հանդիպման մասին` նա նշեց, որ ցավալի է այն փաստը, որ բացակայելու է Երևանում Ղազախստանի նախագահը, ով արդեն երկրորդ անգամ է ցույց տալիս իր լավ վերաբերմունքը ՀԱՊԿ դաշնակցի նկատմամբ։ Բոզոյանի կարծիքով` լարված վիճակը շարունակում է, քանի որ Ղազախստանն ու Ղրղըզստանը ոչ միայն ՀԱՊԿ անդամ են, այլև ներկայացնում են թուրքալեզու երկիր, նրանք փորձում են պահպանել որոշակի չեզոք դիրքորոշում Հայաստանի և Ադրբեջանի նկատմամբ։
Նա հույս հայտնեց, որ ամեն դեպքում այս հարցերը ժամանակի ընթացքում կկարգավորվեն։ ՀԱՊԿ գլխավոր քարտուղարի պաշտոնի հավանական թեկնածուների տարբեր անուններ են նշվում, սակայն վերջին շրջանում հաճախ նշվում է պաշտպանության նախկին նախարար Վաղարշակ Հարությունյանի անունը։ ՀԱՊԿ գլխավոր քարտուղար Նիկոլայ Բորդյուժան ավելի վաղ հայտնել էր, որ նոր գլխավոր քարտուղարի անունը կհայտնեն Երևանում հոկտեմբերի 14-ին ՀԱՊԿ Հավաքական անվտանգության խորհրդի նստաշրջանին, այդ պաշտոնում կնշանակվի Հայաստանի ներկայացուցիչը։
