ԵՐԵՎԱՆ, 11 հոկտեմբերի — Sputnik. Ռուսաստանն ու Թուրքիան «Թուրքական հոսք» խողովակաշարի նախագծի վերաբերյալ միջկառավարական համաձայնագիր են ստորագրել, որով նախատեսվում է խողովակաշարի երկու ճյուղ կառուցել։ Այս մասին հայտնում է ՌԻԱ Նովոստին։
Ռուսաստանի և Թուրքիայի նախագահներ Վլադիմիր Պուտինի և Թայիփ Էրդողանի ներկայությամբ համաձայնագրի տակ ստորագրել են Ռուսաստանի էներգետիկայի նախարար Ալեքսանդր Նովակն ու Թուրքիայի էներգետիկայի և բնական պաշարների նախարար Բերատ Ալբայրակը։
Ավելի վաղ «Գազպրոմի» նախագահ Ալեքսեյ Միլերը հայտարարել էր, որ համաձայնագիրը ենթադրում է մագիստրալային գազատարի երկու ճյուղի շինարարություն Սև ծովի հատակում, յուրաքանչյուր ճյուղի հզորությունը` 15 միլիարդ 750 միլիոն խմ։ Մի ճյուղը նախատեսված է գազն անմիջապես թուրքական շուկա առաքելու համար, մյուսը` Թուրքիայի տարածքով դեպի եվրոպական երկրներ։ Միջկառավարական համաձայնագրում նշված է նաև, որ այդ ճյուղերը պետք է կառուցվեն մինչև 2019թ-ի դեկտեմբեր։
