ԵՐԵՎԱՆ, 11 հոկտեմբերի — Sputnik. Վիկտոր Դալլաքյանը հրաժարվել է ՀՀ նախագահի աշխատակազմի ղեկավարի տեղակալի, ԱԺ-ում նրա մշտական ներկայացուցչի պաշտոններից և պատրաստվում է դիմում ներկայացնել նաև ՀՀԿ-ից դուրս գալու համար: Այս մասին Դալլաքյանը հայտարարեց լրագրողների հետ հանդիպման ժամանակ:
«Այսուհետև վերադառնում եմ ակտիվ քաղաքականություն և ակտիվորեն մասնակցելու եմ 2017-ի խորհրդարանական ընտրություններին,- ասաց Դալլաքյանը,- այսօրվա իմ ելույթից հետո, եթե ինձ կամ իմ ընտանիքի անդամներին որևէ բան պատահի, դրա պատասխանատուն Սերժ Սարգսյանն է»:
Նոր կուսակցություն ստեղծելու և նոր քաղաքական ուժի շրջանակներում ՀՀ պաշտպանության նախկին նախարար Սեյրան Օհանյանի հետ համագործակցության մասին տարածված տեղեկությունները Վիկտոր Դալլաքյանը չցանկացավ մեկնաբանել՝ ասելով, որ այդ մասին կխոսի ավելի ուշ: Բայց բացատեց, որ նոր կուսակցությունը «Շրջադարձ» կկոչվի, ինչպես շրջանառում է մամուլում:
Իսկ քաղաքական կողմնորոշման մասին լրագրողների հարցին Վիկտոր Դալլաքյանն այսպես պատասխանեց.
«Ես ընդդիմադիր եմ ՀՀ դեմոգրաֆիական կատաստրոֆիկ իրավիճակին, երբ ՀՀ-ից արտագաղթել է ավելի քան 400 հազար մարդ, ես ընդդիմադիր եմ ՀՀ-ում բրգաձև կառուցվածք ունեցող կոռուպցիային, ես ընդդիմադիր եմ իրական տվյալներով 70 տոկոս բնակչության համատարած աղքատությանը, ես ընդդիմադիր եմ գործազրկության ահագնացող չափերին, ինքնիշխանության կորստին»:
