ԵՐԵՎԱՆ, 10 հոկտեմբերի — Sputnik. Հոկտեմբերի 9-ի երեկոյան 90 տարեկան հասակում վախճանվել Է լեհ հայտնի ռեժիսոր Անջեյ Վայդան: Այդ մասին հայտնել է Լեհաստանի հեռուստատեսությունը։
Ռեժիսորի հիշատակին արդեն հարգանքի տուրք է մատուցել Լեհաստանի նախագահ Անջեյ Դուդան: «Մահացել Է Անջեյ Վայդան՝ ականավոր լեհ ռեժիսորը, «Օսկարի» դափնեկիրը: Նրա լուսավոր հիշատակը միշտ վառ կմնա»,- ասված Է նախագահի դիվանատան Twitter-յան միկրոբլոգում:
Անջեյ Վայդան ծնվել է 1926 թվականի մարտի 6-ին, Լեհաստանի հյուսիսային Սուվալկի քաղաքում: Պատերազմից հետո գեղանկարչություն է ուսանել Կրակովի գեղարվեստի ակադեմիայում, բայց ավարտելով դասընթացը՝ ընդունվել է Լոձիի կինոդպրոցի ռեժիսուրայի ֆակուլտետ:
Կինոյի դեբյուտը եղել է 1954 թվականին։ Նրա «Սերունդ» ֆիլմը Կինեմատոգրաֆի լեհական դպրոցի սկիզբն է դարձել:
Անջեյ Վայդայի ֆիլմերը բազմաթիվ անգամ «Օսկար» մրցանակի են առաջադրվել «Լավագույն արտասահմանյան ֆիլմ» անվանակարգում: 2000 թվականին ռեժիսորն «Օսկարի» է արժանանացել՝ ձեռքբերումների և համաշխարհային կինոյի զարգացման գործում ունեցած ներդրումների համար:
Ռեժիսոր, սցենարիստ և պրոդյուսեր Անջեյ Վայդան նկարահանել Է «Ջրանցք», «Մոխիր և ալմաստ» նշանավոր ֆիլմերը, էկրանավորել է «Սիբիրյան լեդի Մակբեթը»՝ Լեսկովի ստեղծագործության մոտիվներով, Դոստոևսկու «Չար ոգիները», «Պիղատոսը և մյուսները»՝ Բուլգակովի ստեղծագործության մոտիվներով: Ռեժիսորի ստեղծագործությունն արժանացել է «Օսկար» (2000 թ.), «Սեզար» (1982 թ.) մրցանակների, Կաննի, Վենետիկի և Բեռլինի կինոփառատոների բազմաթիվ պարգևների:
