ԵՐԵՎԱՆ, 10 հոկտեմբերի — Sputnik. ՀՀ վարչապետ Կարեն Կարապետյանի գլխավորությամբ և շահագրգիռ պետական մարմինների ղեկավարների մասնակցությամբ կառավարությունում երկուշաբթի տեղի է ունեցել խորհրդակցություն՝ սիրիահայությանն աջակցություն ցուցաբերելու հարցերի շուրջ, հայտնում են կառավարության մամուլի ծառայությունից:
Մասնավորապես, զեկուցվել է Հայաստանի նախագահի հանձնարարությամբ Սիրիա ուղարկված մարդասիրական օգնության բաշխման վերաբերյալ: Ներկայացվել են նաև վերջին 5 տարում Հայաստանում սիրիահայերին աջակցելու նպատակով պետության կողմից իրականացված կրթական, առողջապահական, սոցիալական ծրագրերը, ինտեգրման և բիզնես ծրագրերին ընդառաջելու հնարավորությունները:
Կառավարության ղեկավարը հանձնարարել է համապատասխան պետական մարմիններին, համագործակցելով ՀՀ արտաքին գործերի և սփյուռքի նախարարությունների հետ, շարունակել համակարգված աշխատանքներն այս ուղղությամբ:
Օրեր առաջ ՀՀ նախագահի հանձնարարությամբ երկու օդանավ` 40 տոննա մարդասիրական օգնություն էր տեղափոխվել Սիրիա։
