ԵՐԵՎԱՆ, 10 հոկտեմբերի — Sputnik. Հայազգի գործարար Լեւոն Հայրապետյանի դուստրը Sputnik Արմենիայի հետ զրույցում պատմեց, որ արդեն շուրջ 2 տարի չի տեսել հորը:
«Տեսել եմ նախանցյալ տարի, երբ ինքը տնային կալանքի տակ էր, մենք գնացինք ու նրա մոտ էինք մնում»,- ասաց Զարինե Հայրապետյանն ու ավելացրեց, որ հայրիկին կալանավորելուց հետո իրենց այլևս թույլ չեն տվել հանդիպել նրան:
2016թ-ի ապրիլի 14-ին Մոսկվայի դատարանը ռուսաստանաբնակ գործարար Լևոն Հայրապետյանին 4 տարվա ազատազրկման դատապարտեց՝ Բաշկիրիայի նախկին սենատոր Իգոր Իզմեստևի մորից 700.000 ԱՄՆ դոլար կաշառք վերցնելու մեղադրանքով։ Ըստ մեղադրանքի` գործարարն այդ գումարի դիմաց Իզմեստևի մորը խոստացել էր որդու նկատմամբ մեղմ դատավճիռ «կազմակերպել»:
Իրավաբան Հայկազ Մակարյանը լրագրողների հետ հանդիպմանը ՀՀ իշխանություններին ու մասնավորապես նորանշանակ վարչապետ Կարեն Կարապետյանին կոչ արեց անուշադրության չմատնել Արցախին իր բարեգործությամբ մեծապես աջակցած հայ գործարարի խնդիրը և նրան Հայաստան տեղափոխելու հարցում բանակցել ՌԴ իշխանությունների հետ:
Հայկազ Մակարյանը նաև մտահոգություն հայտնեց Լևոն Հայրապետյանին «Մատրոսկայա տիշինա» բանտից Մորդովիայի Հանրապետության տարածքում գտնվող մեկ այլ բանտ տեղափոխելու վերաբերյալ: Ըստ փաստաբանի՝ այդ բանտում պայմանները ՌԴ տարածքում ամենասարսափելին են և կարող են կործանարար լինել մի շարք առողջական խնդիրներ ունեցող գործարարի համար:
«Եթե «Մատրոսկայա տիշինա»-ում կալանավորին օրենքով հատկացվող տարածքն ավելի նորմալ է, ապա այդտեղ պայմանները սարսափելի են, մի քանի անգամ վատ: Մորդովիայի բանտը տարբերվում է կալանավորների սպանությունների, խոշտանգումների, ինքնասպանությունների` տարեցտարի ավելացող դեպքերով»,- ասաց իրավաբանը:
Մինչ գործարարի փաստաբանները կսպառեն ռուսաստանյան ներպետական դատական ատյանները, հնարավորություն ստանալով դիմել Մարդու իրավունքների եվրոպական դատարան` իրավաբան Հայկազ Մակարյանի տեղեկություններով, նրանք մեկ այլ դիմումով արդեն իսկ դիմել են ՄԻԵԴ՝ միջազգային արդարադատությանը ներկայացնելով իրենց պաշտպանյալի նկատմամբ անմարդկային վերաբերմունքի փաստերը:
«Խոսքը ոչ թե դատավճիռը բողոքարկելու, այլ մարդուն խոշտանգելու, մարդուն վնասելու մասին է»,- լրագրողների հետ զրույցում նշեց Հայկազ Մակարյանը:
Իրավաբանը նաև վստահություն հայտնեց, որ Լևոն Հայրապետյանի գործի նկատմամբ հայաստանյան,ռուսաստանյան ու նաև աշխարհի խոշոր երկրների իշխանությունների ուշադրության շնորհիվ ազատազրկման դատապարտված գործարարը մինչև տարեվերջ կարող է ազատ կարձակվել:
«Քանի որ դատարանում Լևոն Հայրապետյանի մեղքը չի ապացուցվել, իրենք չեն կարող այդքան երկար ժամանակ օդի մեջ կախված պահել այդ ապօրինությունը: Վաղ թե ուշ պետք է ազատեն, որովհետև հանցանքը չի ապացուցվել,- ասաց Մակարյանը, —դատարանը վճիռ կայացրել է,բայց դատավճիռը կայացվել է սխալ»:
Մինչ իրավական գործընթացները կհասնեն իրենց վերջնական հանգուցալուծմանը, Հայրապետյանի դուստրը պատմեց, որ հայրն իրեն հեռախոսով ասել է, որ բանտից դուրս գալուց հետո վերադառնալու է Արցախ՝ շարունակելու կիսատ մնացած բարեգործական ծրագրերը:
