ԵՐԵՎԱՆ, 9 հոկտեմբերի — Sputnik. Մոսկվայում բնակվող Տիգրան Գրիգորյանը Շուշի քաղաքից ոչ հեռու լեռնային 4 ուղի է ստեղծել: Այս մասին Sputnik Արմենիային ասաց Հայաստանի ալպինիզմի ֆեդերացիայի փոխնախագահ Սուրեն Դանիելյանը:
Նրա խոսքով՝ Գրիգորյանն այդ ուղիները կարողացել է ստեղծել ընդամենը մեկ շաբաթում:
«Տիգրան Գրիգորյանը ղարաբաղցու արմատներ ունի, բայց ծնվել ու ապրում է Մոսկվայում: Վերջերս նա կապ է հաստատել Հայաստանի ալպինիզմի ֆեդերացիայի հետ, պատմել, որ լեռնային երթուղիներ ստեղծող մասնագետ է»,- ասաց Դանիելյանը:
Հետո եկել է Հայաստան, որտեղ նրան մեծ աջակցություն է ցուցաբերել Հայաստանի ալպինիզմի ֆեդերացիան: Անհրաժեշտ երթուղիները ստեղծելու համար Տիգրանը մեկ շաբաթով մեկնել է Արցախ:
«Այսօր արդեն նա կվերադառնա Երևան: Տիգրանի շնորհիվ մենք արդեն լեռնային երթուղիներ ունենք Արցախում: Սա առաջին հերթին հրաշալի նորություն է տեղի երիտասարդների համար, որոնք զրկված էին լեռնագնացությամբ զբաղվելու հնարավորությունից: Եվ երկրորդ՝ այս փաստն ավելի մեծ թվով զբոսաշրջիկների կգրավի»,- ասաց Դանիելյանը:
Ալպինիստների օրվա կապակցությամբ նա նաև խոսեց ֆեդերացիայի ձեռքբերումների մասին:
«2017 թվականին մենք քանակը կվերածենք որակի: 40 պրոֆեսիոնալ ալպինիստ ունենք, 50 երեխա և 200 սկսնակ: Մեծ թվով մարզումներ կանցկացնենք, յուրաքանչյուր ալպինիստի դեպքում կզարգացնենք այն, ինչը նրա մոտ ավելի լավ է ստացվում: Այսինքն՝ շեշտը կդնենք նեղ մասնագիտացման վրա»,- ասաց նա:
Ֆեդերացիայի ձեռքբերումներից մեկն էլ, ըստ Դանիելյանի, ալպինիզմը հանրաճանաչ դարձնելն է: Նրա խոսքով՝ աշխարհում ավելի քան 1000 մարդ արդեն գիտի, որ Հայաստանը ներուժ ունեցող «ալպինիստական» երկիր է:
Բացի այդ, ֆեդերացիան սաներ է պատրաստում, որոնց արշավների անվտանգությունը լիովին թափանցիկ է, և մրցակցություն է ծավալվել ալպինիստների խմբերի միջև:
«Նախկինում վերելքներն ու արշավները կամայական բնույթ էին կրում: Ով ինչպես ուզում էր, այդպես էր անում, իսկ այսօր բոլորն արդեն գիտեն, որ Ալպինիզմի ֆեդերացիան կիմանա բոլոր գործողությունների մասին»,- ասաց Դանիելյանը:
2016 թվականը հաջող տարի է եղել հայ ալինիստների համար: Նրանք հաղթահարել են Լենինի գագաթը, Էլբրուսի (ձմեռային, գարնանային և ամառային, այդ թվում՝ միայնակ), Դեմավեդի, Կազբեկի, Մոնբլանի, Մատերհորնի և այլ գագաթներ: Այս տարվա ամենակարևոր իրադարձություններից մեկն Արա Խաչադուրյանի և Իրենա Խարազովայի՝ Էվերեստ բարձրանալն էր: Մինչև հիմա աշխարհի ամենամեծ գագաթը նվաճել են երեք հայեր՝ Լև Սարկիսովը, Կարո Հովասափյանը և Իգոր Խալաթյանը:
Հայկական լեռների և ալպինիստների օրը հոկտեմբերի 9-ին նշելը պատահական չէ: 1829թ-ի այդ օրը արևելահայ աշխարհաբար գրականության հիմնադիր Խաչատուր Աբովյանը արշավախմբի հետ՝ Դորպատի համալսարանի պրոֆեսոր Պարրոտի գլխավորությամբ, առաջին անգամ բարձրացել է Արարատ լեռը:
