ԵՐԵՎԱՆ, 7 հոկտեմբերի — Sputnik. Զորավարժությունները մեկնարկեցին երկու երկրի ստորաբաժանումների պատրաստվածության մասին զեկույցով։ Ստորաբաժանումների համատեղ գործողությունների ընթացքում հրամաններ էր տալիս Հայաստանի և Ռուսաստանի զորքերի միացյալ խմբավորման ղեկավարը։
«Ես «Սոկոլն եմ», պատրաստ եմ մարտի», — ռացիայից հնչեց ռուս զինվորականի ձայնը։ «Ես «Արյոլն եմ», պատրաստ եմ մարտական հրաձգության», — ի պատասխան հնչեց հայկական ակցենտով ձայնը, ինչը ժպիտ բերեց հրամանատարային կետում նստած զինծառայողների դեմքին։
Զորավարժությունների առաջին փուլում սահմանապահների և երկու երկրների հատուկ նշանակության զորքերի ուժերով կասեցվեց հակառակորդի զինված խմբավորման սադրանքի փորձն ու պետական սահմանին ուղղված դիվերսիան։ Այդ գործողությունը պետք է հայ-ռուսական համատեղ ստորաբաժանումներին շեղեր հակառակորդի հարձակման հիմնական ուղղությունից։
Երկրորդ փուլում գործի անցավ ավիացիան, որին հետևեցին հրետանին, տանկերն ու մյուս զրահատեխնիկան։ Հայ և ռուս զինծառայողների հղկված և պրոֆեսիոնալ գործողությունների արդյունքում կարճ, բայց բավական դիտարժան մարտից հետո պայմանական հակառակորդը տապալվեց ու հետ շպրտվեց։
Երկու կողմն էլ զորավարժությունների ընթացքում գործի դրեց ՄԻԳ-29 կործանիչներ, Մի-24 և Մի-8 ուղղաթիռներ, տանկեր, հետևակի մարտական մեքենաներ (ՀՄՄ), ԲՏՌ և այլ զրահատեխնիկա, նռնականետեր, Դ-30 հաուբիցներ, «Գրադ» համակարգեր, ինքնագնաց հրետանային կայանք, ինչպես նաև հեծելազորի տարբեր ստորաբաժանումներ (շուրջ 1.5 հազար մարդ)։ Զորավարժությունները ղեկավարում էր Հայաստանի և Ռուսաստանի զորքերի միացյալ խմբավորման հրամանատար գեներալ-մայոր Անդրանիկ Մակարյանը։ Նա բարձր գնահատեց զորքերի գործակցության մակարդակը և զորավարժությունների արդյունքները։
«Այս զորավարժություններն անցկացվում էին Հայաստանի անկախության 25-ամյակի կապակցությամբ անցկացվող միջոցառումների շրջանակում, քանի որ այդ տոնը պետք է նշվի ինչպես շքերթների, այնպես էլ մարտական զորավարժությունների ժամանակ», —լրագրողներին ասաց Մակարյանը։
Հայկական և ռուսական զորքերի համակարգումը դրական գնահատեց նաև 102-րդ ռուսական ռազմակայանի հրամանատարի պաշտոնակատար գնդապետ Ալեքսեյ Նաումենկոն։ Նրա խոսքով` զորավարժություններին մասնակցող անձնակազմը մարտական գործողությունների ժամանակ հմուտ և վստահ գործեց։
«Լեզվական խոչընդոտը հաղթահարված է, հրամանատարները ճանաչում են միմյանց և մարտի դաշտում սատարում իրար», — ասաց Նաումենկոն։
Զորավարժություններին ներկա էր նաև Հայաստանում Ռուսաստանի արտակարգ և լիազոր դեսպան Իվան Վոլինկինը։ Sputnik Արմենիայի թղթակցի հետ զրույցում ասաց, որ զորավարժություններն անցան «հավեսով», ու երկու երկրների զորքերը գործեցին հստակ, ծրագրին համապատասխան։
«Մեր տեսածն անչափ տպավորիչ էր։ Տպավորիչ էին թե՛ անձնակազմի համակարգված գործողությունները, թե հզոր տեխնիկան։ Կարծում եմ` դաշնակիցների դեպքում միշտ պետք է այդպես լինի», — ասաց Վոլինկինը։
Զորավարժություններն անցկացվեցին երկու երկրի պաշտպանության նախարարների պայմանավորվածությունների շրջանակում։ Նպատակն էր մարտական պայմաններում ստուգել Հայաստանի և Ռուսաստանի զորքերի միացյալ խմբավորման դեմ ծառացած պահանջների կատարման կարողությունը։
