Այս տարի Վլադիմիր Պուտինն իր ծննդյան օրը կնշի հարազատների, մտերիմների և ընկերների հետ, լրագրողներին է ասել ՌԴ նախագահի մամուլի քարտուղար Դմիտրի Պեսկովը։
Պուտինը հոկտեմբերի 7-ին պաշտոնական միջոցառումների չի մասնակցի, սակայն մի քանի հեռախոսազրույց կունենա։
Անցյալ տարի Վլադիմիր Պուտինն իր ծննդյան օրը հանդիպում էր ունեցել պաշտպանության նախարար Սերգեյ Շոյգուի հետ և մասնակցել Սոչիում անցկացված հոկեյի խաղին։ Դրանից մեկ տարի առաջ նախագահն առաջին անգամ իր ծննդյան օրը հանգիստ էր վերցրել և մեկնել Սիբիր, որտեղ մոտակա բնակելի տարածքից հարյուրավոր կիլոմետրի վրա գտնվող լեռանային տեղանքում ոտքով գրեթե 9 կմ էր հաղթահարել։
Նախագահն իր ծննդյան օրվա կապակցությամբ տարբեր տարիների ընթացքում բազմազան ինքնատիպ նվերներ է ստացել` վագրի ձագից մինչև Մոնոմախի գլխարկ։ Պեսկովի խոսքով`սովորաբար նվերների մեծ մասը տեղափոխվում է նախագահի գրադարան և պահվում այնտեղ, սակայն որոշ նվերներ էլ Պուտինն իրեն է պահում։
