ԵՐԵՎԱՆ, 7 հոկտեմբերի — Sputnik. Կոլումբիայի նախագահ Խուան Մանուել Սանտոսը Խաղաղության Նոբելյան մրցանակի է արժանացել այն ջանքերի համար, որոնք ուղղված են եղել իշխանությունների և «Կոլումբիայի հեղափոխական զինված ուժեր» խմբավորման (FARC) անդամների հակամարտության կարգավորմանը։ Այս մասին հայտնում է ՌԻԱ Նովոստին:
Խաղաղության Նոբելյան մրցանակակրի անունը հայտարարվել է Օսլոյում հոկտեմբերի 7-ին:
Սեպտեմբերին Կոլումբիայի իշխանությունները հաշտության պատմական համաձայնագիր էին կնքել «Կոլումբիայի հեղափոխական զինված ուժեր» խմբավորման անդամների հետ: Փաստաթուղթը ստորագրվել է կոլումբիական Կարտախենա քաղաքում: Հայտնի է, որ պատմական փաստաթղթի տակ ստորագրել էին երկրի նախագահ Խուան Մանուել Սանտոսն ու ապստամբների նախկին առաջնորդ Ռոդրիգո Լոնդոնյո Էչևերին:
Նշվում է, որ հաշտության համաձայնագիրը կնքվել է 52 տարի տևած քաղաքացիական պատերազմից հետո: Այդ ընթացքում զոհվել է 260.000 մարդ, ևս 6 միլիոնը ստիպված են եղել լքել իրենց տները:
