ԵՐԵՎԱՆ, 5 հոկտեմբերի — Sputnik. ԱԺ ՀՅԴ խմբակցության պատգամավոր Կարեն Շահմուրադյանն այսօր կառավարության հետ հարցուպատասխանի ժամին ՀՀ վարչապետ Կարեն Կարապետյանին հիշեցրեց, որ նա խոստացել է գործադիր իշխանություն բերել բարձր որակավորում ունեցող մասնագետների և հետաքրքրվեց, թե ինչպես է պատրաստվում դա անել` հաշվի առվելով մասնավոր հատվածում նրանց ստացած բարձր և պետական ապարատի` ցածր աշխատավարձերի փաստը:
Վարչապետի պատասխանն առավել քան անկեղծ էր: «Չգիտեմ»,-ասաց նա` հիշեցնելով, որ նախապես պայմանավորվել էին անկեղծ խոսել:
«Իրոք, չգիտեմ: Պետք է ընտրենք մարդկանց, որոնք միսիա են տեսնում, և այս պահին խոսել պետական ծառայողի աշխատավարձի բարձրացման մասին, երբ մենք բազմաթիվ խնդիրներ չենք լուծել, ճիշտ չի լինի: Բայց ի վերջո պետական կառավարման համակարգն արդյունավետ դարձնելու համար մենք անպայման այդ հարցին պետք է անդրադառնանք` հակառակ դեպքում մենք չենք ունենալու որակյալ կառավարիչներ»,-ասաց վարչապետը` ավելացնելով, որ այդ խնդիրը կա, բայց դրա լուծումն առայժմ հեռու է:
