ԵՐԵՎԱՆ, 5 հոկտեմբերի — Sputnik. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը Sputnik Արմենիայի թղթակցին հայտնել է, որ մեծ համերգին նախապատրաստվելու գործում ամենահետաքրքիրը երգիչների հետ աշխատանքն է։
Մաեստրոյի խոսքով` նրա բախտը բերել է, քանի որ արդեն 16 տարի է` աշխատում է Դմիտրի Խվորոստովսկու (Ռուսաստանի ոսկե բարիտոն) և «Մետրոպոլիտեն օպերայի» երգիչների հետ։
«Ինձ համար ամենակարևորը ստեղծագործական գործընթացն է, ինչպես նաև` հասկացող և սիրելի գործընկերների հետ աշխատելը։ Հայաստանը հրաշալի ձայներ ունի», — ասաց Օրբելյանը։
Նա հույս ունի, որ մեր երկրում հանդես գալու համար այլ երկրներից էլ երգիչներ կգան Հայաստան, կհամագործակցեն հայ երգիչների հետ։
«Սա իմ առաջին համերգն է օպերային թատրոնում։ Նվագախումբը, երգչախումբը, առաջատար մեներգիչների մի մասն այդ օրը կկատարեն «Աիդա», «Տրուբոդուր», «Կարմեն», «Նորմա» և այլ օպերաներ։ Հանդիսատեսը կդիտի նաև «Եվգենի Օնեգին» ներկայացումը, որը վաղուց այստեղ չէր ներկայացվել», — ասաց Օրբելյանը։
Նրա խոսքով` հանդիսատեսը կլսի արիաներ, նվագախմբային կատարումներ, կվայելի գալա համերգի գեղեցիկ մթնոլորտը։
Ըստ Օրբելյանի` համերգի հատուկ հյուրն է երաժիշտ Ստեֆան Հարիսը (Մեծ Բրիտանիա)։
«Մինչև 2017 թվականի գարնան ավարտը օպերայի և բալետի ազգային ակադեմիական թատրոնում մի շարք պրեմիերաներ կլինեն, մասնավորապես, «Տոսկա» օպերան: Հիմա նախապատրաստական աշխատանքներ են տարվում», — ասաց դիրիժորը։
Օրբելյանը նշեց նաև, որ շատ զբաղված երաժիշտ է և անընդհատ հյուրախաղերի է մեկնում, սակայն Երևանում բնակարան ունի և շուտով կտեղափոխվի Հայաստան ու ամբողջովին կնվիրվի աշխատանքին։
Ա.Սպենդիարյանի անվան օպերայի և բալետի ազգային ակադեմիական թատրոնի տնօրեն Անդրանիկ Արզումանյանն իր հերթին նշեց, որ ուղևորություններն Օրբելյանին չեն խանգարում, և նա հանգամանորեն պատրաստվում է առաջիկա համերգին։
Նա նաև նշեց, որ այն փաստը, որ մաեստրոն է ղեկավարում օպերայի և բալետի ազգային ակադեմիական թատրոնը, կօգնի կապ հաստատել միջազգային մակարդակի երաժիշտների հետ։
