ԵՐԵՎԱՆ, 5 հոկտեմբերի — Sputnik. Մշակույթի նախարար Արմեն Ամիրյանն այսօր անդրադառնալով Հանրային հեռուստաընկերության հեռուստահաղորդումներին` նշեց, որ ժամանցային հաղորդումներն անհրաժեշտ են, բայց կա որակի խնդիր:
«Որակը պետք է ձևավորի նաև մշակույթի նախարարությունը` հանրության մեջ ձևավորելով լավ երաժշտության, բարձրորակ, ազգային երաժշտության պահանջարկ: Իսկ դա արվում է միայն ու միայն ճիշտ մշակութային քաղաքականությամբ, որն այս պահին մշակվում է»,- ասաց նախարարը:
Արմեն Ամիրյանը նաև նշեց, որ իրեն խիստ մտահոգում են այն ցածրորակ ու ցածրաճաշակ հեռուստասերիալներն ու հաղորդումները, որ այսօր հրամցվում են հեռուստադիտողին:
«Ես կարծում եմ` դրանց շատ արագ պետք է լուծում տրվի, պետք է նաև հանրության պատկերացումները վերատեսության ենթարկել»,- ասաց նախարարը` հավելելով, որ այսօր մշակույթի ամենակարևոր խնդիրը հենց հանրային ճաշակի վերափոխումն է:
Իսկ որակյալ արվեստը Հայաստան բերելու առաջին քայլերից մեկը Արմեն Ամիրյանը նշեց Կինոյի մասին օրենքի ընդունումը, ինչը թույլ կտա մեր երկիրն ընկալել որպես լուրջ գործընկեր:
Անդրադառնալով իր` Գրին քարտ ունենալու մասին լուրերին Արմեն Ամիրյանը չհերքեց դրանք, այլ նշեց, որ ոչ թե շահել է, այլ` նվեր ստացել ԱՄՆ-ի կողմից: Բայց երբեք չի մտածել երկիրը լքելու մասին:
«Թեև այս պահին իմ տղան ու աղջիկն այնտեղ են` աշխատում են, սովորում են, բայց ես երբեք չեմ մտածել, որ նրանք այնտեղ հիմնավոր են: Մակարդակը, որ այնտեղ գոյություն ունի, այդ բազան հավաքելով, կկարողանան օգտակար լինել հայրենիքին»,- նշեց Արմեն Ամիրյանը:
Ինչ վերաբերում է վերացած ու վերացող պատմամշակութային հուշարձաններին, Արմեն Ամիրյանը նշեց, որ եթե պետությունը չի զբաղվում իր հուշարձաններով, գալիս են մարդիկ, որոնք զբաղվում են:
Արմեն Ամիրյանը նաև խոստացավ, որ այսուհետ ցանկացած հրապարակում, հանրային կարծիք, դժգոհություն, ահազանգ մշակույթի նախարարությունում դառնալու է հանձնարարական:
