ԵՐԵՎԱՆ, 4 հոկտեմբերի — Sputnik. ԵԱՀԿ Մինսկի խմբի ամերիկացի համանախագահ Ջեյմս Ուորլիքը ՌԻԱ Նովոստիին հայտնել է, որ ԵԱՀԿ Մինսկի խմբի համանախագահները հուսով են, որ Հայաստանի ու Ադրբեջանի նախագահները կհամաձայնեն Ղարաբաղյան հակամարտության կարգավորման վերաբերյալ հանդիպում անցկացնել:
«Հուսով ենք, որ նախագահները կհամաձայնեն հաջորդ հանդիպումն անցկացնել: Այս պահի դրությամբ հաջորդ հանդիպման տեղն ու ժամկետը հստակեցված չեն: Համանախագահները հակամարտող կողմերի հետ աշխատում են այդ ուղղությամբ»,- ասել է Ուորլիքը:
Նյու Յորքում անցկացված ՄԱԿ-ի գլխավոր վեհաժողովի ժամանակ համանախագահներն առանձին հանդիպումներ են ունեցել Հայաստանի ու Ադրբեջանի արտգործնախարարների հետ՝ քննարկելու համար Վիեննայում ու Սանկտ Պետերբուրգում ձեռք բերված պայմանավորվածությունները, ինչպես նաև հետագա քայլերը:
«Ամսվա վերջին մենք տարածաշրջան կայցելենք։ Ծրագրում ենք հանդիպումներ անցկացնել և հարցերը քննարկել կողմերի հետ»,- նշել է Ջեյմս Ուորլիքը:
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
