ԵՐԵՎԱՆ, 4 հոկտեմբերի — Sputnik. Օգոստոս-սեպտեմբեր ամիսներին Սիրիայում զոհվել է 8, վիրավորվել՝ 11 հայ, այս մասին այսօր լրագրողներին հայտնեց սփյուռքի փոխնախարար Սերժ Սրապիոնյանը: Նախարարության հաշվարկներով՝ Սիրիայի հայաշատ բնակավայրերում այս պահին շուրջ 20 000 հայ է բնակվում:
Sputnik Արմենիայի հարցին, թե ինչու են մեր հայրենակիցները Հայաստան գալու փոխարեն շարունակում ապրել կրակոցների ու ռմբակոծությունների ներքո, Սրապիոնյանը պատասխանեց.
«Այնքան էլ հեշտ չէ սիրիահայերի տեղափոխման կազմակերպումը Հայաստան: Սիրիայի Հանրապետության քաղաքացի հայերն ունեն բազմաթիվ պարտավորություններ այդ պետության հանդեպ՝ և´ զինապարտության, և´ բանկային տարբեր պարտավորություններ: Ամենից առաջ մարդն ինքը պետք է ցանկանա գալ: Եթե որևէ սիրիահայ կվկայի, որ դիմել է ՀՀ պաշտոնական աղբյուրներին, քայլեր չեն ձեռնարկվել մեր կողմից, ես պատրաստ եմ իմ ամեն քայլի համար պատասխան տալ: Իրենք պետք է ցանկանան»:
Տարածված կարծիքին, թե Հայաստանում վիճակն այնքան վատ է, որ սիրիահայերը գերադասում են մնալ իրենց ծննդավայրում, Սրապիոնյանը չհամաձայնեց:
«Իհարկե, Հայաստանում սոցիալ-տնտեսական վիճակը բավականին ծանր է, բայց այդ վատ վիճակով հանդերձ այստեղ ապրող սիրիահայերն այսօր անհամեմատ ավելի արտոնյալ վիճակում են: Մենք հնարավոր ամեն ինչ անում են երկիրը սիրիահայերի համար գայթակղիչ դարձնելու համար, որ գան, հարմարվեն, պետության սուղ միջոցներից սիրիահայերին անպայման հատկացվում է»,- ասաց նա:
Ի դեպ, սփյուռքի փոխնախարարը հայտարարեց, որ վերջին շրջանում, երբ Սիրիայում դարձյալ ռազմական իրավիճակը սրվել է, Հայաստան տեղափոխվելու խնդրով նախարարությանը ոչ մի սիրիահայ չի դիմել:
Փոխարենը ավելի քան 30 սիրիահայ այդ օրերին դիմել է «Հալեպ» հայրենակցական- բարեսիրական ՀԿ-ին: Կազմակերպության տնօրեն Հայասա Թահմազյանի խոսքով՝ Սիրիայում մնացած հայերը ցանկություն ունեն Հայաստան գալու, բայց գումար չունեն:
«Ցանկանում են գալ, բայց ֆինանսական միջոցներ չունեն՝ ձեռք բերելու մեկ ուղղությամբ տոմս դեպի Հայաստան: Եվ մեր կազմակերպությունն անհատ բարերարների միջոցով և Թեքսասի Հյուսթոն քաղաքի Հայ առաքելական եկեղեցու աջակցությամբ, որը 130 հայերի համար տոմսեր է գնել, կարողացել ենք կազմակերպել նրանց տեղափոխումը»,- ասաց ՀԿ տնօրենը:
Ընդհանուր առմամբ կազմակերպությունը 2015թ-ից շուրջ 600 դիմում է ստացել, որոնցից 200-ն արդեն տեղափոխվել են Հայաստան, ևս 100-ը կտեղափոխվեն մինչև նոյեմբեր:
Սիրիայում մնացած հայերին օգնելու համար հոկտեմբերի 3-ին ՀՀ կառավարության կողմից 20 տոննա սննդամթերքով բեռնված առաջին ինքնաթիռն է վայրէջք կատարել Սիրիայում, սննդով և ջրով բեռնված ևս մեկ ինքնաթիռ կմեկնի այսօր՝ ուշ երեկոյան:
