ԵՐԵՎԱՆ, 4 հոկտեմբերի — Sputnik. Ութամյա Էրիկ Պետրոսյանը նվաճել է ժյուրիի անդամների սրտերը և Հունաստանի Սալոնիկ քաղաքում սեպտեմբերի 25-ից հոկտեմբերի 1-ը տեղի ունեցած Little Miss and Mister World 2016 մանկական հեղինակավոր մրցույթում արժանացել Mini Mister World 2016 տիտղոսին։ Sputnik Արմենիայի հետ զրույցում Էրիկը պատմեց, որ սիրում է մաթեմատիկա, պարեր, ցանկանում է ուտելիք պատրաստել սովորել և երազում է արվեստագետ դառնալ։
«Մենք մեկ շաբաթով էինք մեկնել Հունաստան։ Ինձ այնտեղ շատ դուր եկավ։ Ես առաջին անգամ էի ինքնաթիռով թռչում։ Ինձ թվում էր, որ նման բան միայն երազում է լինում, բայց ես արեցի դա։ Ինձ շատ դուր եկավ», — ասաց Էրիկը։
Նա ընկերացել է Ռուսաստանի, Ուկրաինայի, Բրազիլիայի մասնակիցների հետ, որոնց հետ շփվել է ռուսերեն և անգլերեն։
«Մենք ամեն օր պատրաստվում էինք։ Մեզ հետ պարապում էր ուկրաինացի մանկավարժ և սովորեցնում, թե ինչպես պետք է ճիշտ քայլել և ելույթ ունենալ։ Ես նաև տեսանյութ եմ ներկայացրել, որում հանդես եմ եկել հովվի դերում։ Ինձ հետ նկարվել են ոչխարներ և կովեր… Սկզբից ես մի փոքր վախեցա նրանցից, բայց հետո սովորեցի», — ասաց մրցույթի փոքրիկ հաղթողը։
Էրիկը պատմեց, որ մրցույթի առաջին փուլում բեմ է դուրս եկել Հայոց թագավոր Արգիշտի 1-ինի հագուստով` այդպիսով ներկայացնելով տարազը։ Հաջորդ ելույթի ժամանակ Էրիկը հանդես է եկել հովվի կերպարով, երրորդ փուլում «Անտիկ Հունաստանի» ոճով ելույթի ժամանակ հանդես է եկել համապատասխան հագուստով։ Էրիկը խոստովանեց, որ վստահ է եղել իր հաղթանակին։
Նրանից բացի` հայկական թիմին հաղթանակ է պարգևել նաև 12-ամյա Արման Օհանյանը, որը հաղթող է դարձել Prince անվանակարգում, Էլեն Գասպարյանը (12 տարեկան) մրցանակ է ստացել Best Art Costume անվանակարգում և արժանացել Top Model կոչմանը։ Իսկ Արա Ստեփանյանը (11 տարեկան) արժանացել է մրցույթի Գրան պրիին։ Երկու ամիս առաջ Արան Բուլղարիայում նույնպես արժանացել է Little Miss and Mister Planet 2016 մրցույթի գլխավոր մրցանակին։
Top Model Armenia ազգային ասոցիացիայի գործադիր տնօրեն Լուսինե Բաղդասարյանը հավելեց, որ հայ երեխաներն առաջին հայացքից նվաճել են ժյուրիի և հանդիսատեսի սրտերը։
«Հայաստանը երկրորդ անգամ է մասնակցում մրցույթին, և մենք որոշեցինք շատ լավ նախապատրաստվել։ Այս տարի էմոցիաները շատ էին։ Մենք հպարտ էինք, որ ներկայացնում ենք Հայաստանը։ Մասնակիցները շատ էին` 60 մասնակից 40 երկրներից», — ասաց Բաղդասարյանը Sputnik Արմենիա մուլտիմեդիոն մամուլի կենտրոնում։
Նրա խոսքով` հայ երեխաներն արտասահմանում նոր մրցույթների մասնակցելու բազմաթիվ հրավերներ են ստացել։ Little Miss and Mister World 2016 մրցույթն անցկացվում էր 16-րդ անգամ, իսկ Հայաստանը մրցույթին մասնակցում էր 2-րդ անգամ: Մրցույթի ձևաչափն այս տարի փոքր-ինչ փոխվել էր: Մրցույթին մասնակցում են նաև տղաներ, հետևաբար մրցույթն այս տարի Little Miss and Mister World անունն էր ստացել:
Մրցույթի թեման էր «Ծաղկող երկրագունդն», և պետք էր ցուցադրել մասնակցի հոգատարությունը և սրտացավությունը բնության նկատմամբ:
