ԵՐԵՎԱՆ, 3 հոկտեմբերի — Sputnik. «Հոգիների աճուրդ» անվանումը հիշեցնում է հայտնի ֆիլմը, որը 1918 թվականին նկարահանեց «Մետրո Գոլդվին Մեյեր» կինոընկերությունը։ Այն ներկայացնում է Մեծ եղեռնից փրկված Ավրորա Մարդիգանյանի պատմությունը։ Ֆիլմը հիմնված է իրական փաստերի վրա, սակայն ժանրը գեղարվեստական է։
Կանադահայ ռեժիսոր և դերասանուհի Արսինե Խանջյանը հայտնեց, որ իր ներկայացումը համանուն է, սակայն ինֆորմացիան որևէ կապ չունի ֆիլմի հետ։ Տեղեկությունները նա հավաքագրել է արխիվային նյութերից։ Իսկ թատերական ներկայացման բուն նպատակը ցեղասպանությունը վերապրած հայուհու հիշատակը վառ պահելն է։
«Մի քանի տարի է, ինչ Ավրորա Մարդիգանյանն իմ մտքերում էր, մտածում էի` ինչ կարելի է անել նրա կյանքը ներկայացնելու համար։ Ներկայացումը պատրաստվեց 3 շաբաթվա ընթացքում Բեռլինի «Մաքսիմ Գորկի» թատրոնում։ Ուզում եմ Ավրորային ներկայացնել այնպես, ինչպես ինքը կցանկանար հիշվել, ուզում եմ նա իր ձայնով բացատրի իր ով լինելը»,-ասաց Խանջյանը` ներկայացման ժանրն անվանելով «դասախոսություն»։
Կանադահայ ռեժիսորին ուղեկցում էր ներկայացման դերակատարներից մեկը` Գերմանիայում ծնված թուրք Թաներ Շահինթյուրքը, որը չի վախենում առերեսվել պատմությանը։ Երբ նա սկսեց խոսել` հպարտությամբ նշելով իր մասնակցության ու ցեղասպանության ճանաչման մասին, Արսինե Խանջյանը հուզվեց ու չկարողացավ զսպել արցունքները։
«Հատկապես ինձ համար մեծ պատիվ է այս ներկայացման մաս լինել։ Ես արմատներով թուրք եմ, բայց ծնվել ու մեծացել եմ Գերմանիայում, ինձ համար մեծ պատիվ է այս ներկայացման մի մասնիկը լինել։ Իմանալով, թե Թուրքիայի մեջ ինչ կեցվածք ունեն այս թեմայի վերաբերյալ` իբրև դերասան իմ ջանքը կթափեմ, որ ազգակիցներիս կեցվածքը փոխեմ։ Ոչ մի բացասական վերաբերմունք չառաջացավ իմ դերի նկատմամբ։ Մարդիկ կային նաև, որ շնորհակալություն հայտնեցին իմ գործունեության վերաբերյալ»,- ասաց Թաներ Շահինթյուրքը։
Երեկ, ինչպես ինքն է խոստովանում, իրեն բախտ վիճակվեց լինել ցեղասպանության թանգարանում։ Բառեր չգտավ ներկայացնելու` ինչ է զգացել։ Հույս հայտնեց, որ ապագայում Թուրքիան ևս կառերեսվի պատմությանն ու իր հարկի ներքո կներկայացնի «Հոգիների աճուրդ» ներկայացումը։
Ի դեպ, դերասանն աշխատում է Բեռլինի «Մաքսիմ Գորկի» թատրոնում։ Նրանք մի քանի անգամ անդրադարձել են ցեղասպանության թեմային։ Իսկ թատրոնում նա միակ թուրքը չէ։
«Հոգիների աճուրդ» ներկայացումը հնարավոր կլինի դիտել հոկտեմբերի 3-ին, 19։00-ին` Հովհաննես Թումանյանի անվան պետական տիկնիկային թատրոնում։
