ԵՐԵՎԱՆ, 3 հոկտեմբերի – Sputnik. ՄԱԿ-ի զբոսաշրջության համաշխարհային կազմակերպության գլխավոր քարտուղար Թալեբ Ռիֆաին երրորդ անգամ է այցելում Հայաստան: Եղել է Երևանում, Սևանում, Դիլիջանում: Խոստովանում է, որ բավական երկար կանգնել է Արարատի ստորոտին ու հիացել լեռան տեսքով: Բայց ՄԱԿ-ի պաշտոնյային ամենից շատ տպավորել են մեր երկրում ապրող մարդիկ։
«Հայաստանի ամենագեղեցիկ բանը մարդիկ են: Աշխարհում շատ ժողովուրդներ կարող են ասել, որ ունեն գեղեցիկ լճեր, լեռներ, բայց կարծում եմ` ամենակարևորը ճանապարհորդի համար այդ երկրի ժողովուրդն է: Սա ամենատպավորիչն է Հայաստանում: Դուք շատ լավ ու ապահով եք ձեզ զգում ձեր երկրում»,- Sputnik Արմենիայի հարցին ի պատասխան ասաց Թալեբ Ռիֆաին:
Երեք այցելությունը Հայաստանը ճանաչելու համար չափազանց քիչ է: Մեր զրուցակիցը խոստովանում է, որ ամեն անգամ, երբ գալիս է Հայաստան, հասկանում է, թե որքան շատ բան դեռ չի տեսել այստեղ:
«Հաջորդ անգամ, երբ գամ, ընտանիքիս հետ եմ գալու»,- ասաց նա՝ ավելացնելով, որ Հայաստանը բավականաչափ զարգացած է զբոսաշրջիկներին ընդունելու համար:
Իսկ առաջին դրական տպավորությունը ՄԱԿ-ի զբոսաշրջության համաշխարհային կազմակերպության գլխավոր քարտուղարը ստացել է հենց օդանավակայանում: Այն, իր բնորոշմամբ, ոչ միայն տարածաշրջանի լավագույն օդանավակայանն է, այլև տարածաշրջանից դուրս՝ լավագույններից մեկը:
Հայաստանում զբոսաշրջության զարգացման առաջին նախապայմանը Թալեբ Ռիֆաին համարում է տեղեկացվածությունը: Աշխարհում, ըստ նրա, չափազանց քիչ են մարդիկ, որոնք գիտեն Հայաստանի մասին:
ՀՀ էկոնոմիկայի փոխնախարար Գարեգին Մելքոնյանի վկայակոչած պաշտոնական վիճակագրությունը, սակայն փաստում է, որ վերջին 5 տարում Հայաստան եկող զբոսաշրջիկների թիվն ավելացել է 9%-ով: 2015թ-ին մեր երկիր է այցելել 1 200 000 մարդ: Բայց տուրիզմի զարգացմանը զուգահեռ, փոխնախարարի համոզմամբ, պետք է զարգանան նաև ենթակառուցվածքները, որոնք առայժմ ցանկալի մակարդակի չեն:
«Վերջին տարիներին Հայաստանում կառուցվել է ավելի քան 20 հյուրանոց, շուրջ 100 այլ զբոսաշրջային տնտեսություն՝ ընդհանուր առմամբ ավելացնելով շուրջ 10 000 ննջատեղ: Սա էական բարելավում է սպասարկման տեսանկյունից, բայց մենք վստահ ենք, որ առաջիկայում զարգացման ավելի մեծ դինամիկ է լինելու։ Մենք մեր ուշադրությունը պետք է պահենք ենթակառուցվածքային զարգացման վրա»,- ասաց էկոնոմիկայի փոխնախարար Գարեգին Մելքոնյանը:
Երևանում այսօր մեկնարկել է ՄԱԿ-ի զբոսաշրջության համաշխարհային կազմակերպության 38-րդ նստաշրջանը: Այս տարի այն առաջին անգամ անցկացվում է կազմակերպության կենտրոնակայանից դուրս, և ՄԱԿ-ի զբոսաշրջության համաշխարհային կազմակերպության գլխավոր քարտուղար Թալեբ Ռիֆաիի խոսքով, միջոցառումն աշխարհին ներկայանալու բացառիկ հնարավորություն է ընձեռում մեր երկրին: Միջոցառման կազմակերպիչները վստահ են, որ տարբեր երկրներից ժամանած մասնակիցներն իրենց երկրներ վերադառնալով, ներկայացնելու են Հայաստանը որպես զբոսաշրջության համար լավագույն երկրներից մեկը:
