ԵՐԵՎԱՆ, 2 հոկտեմբերի-Sputnik. Հալեպում քաղաքացիները մտածում են, որ իրենք մենակ չեն, և Ռուսաստանը, լինելով իրենց կողքին, կաջակցի ահաբեկչության դեմ պայքարում: Այս կարծիքին է «ՍՕՍ. Արևելքի քրիստոնյաներ» ասոցիացիայի անդամ Բենջամեն Բլանշարը: Նրա խոսքով՝ մարդկանց մեջ չնչին հույս է մնացել, որ իրավիճակը մի օր կկայունանա:
«Չնայած Հալեպում անվերջանալի թվացող կրակոցներ ու բախումներ էին, բայց քաղաքի արևմտյան թաղամասերում կյանքը կանգ չէր առնում. այն դպրոցներն ու համալսարանը, որոնք չէին ավերվել, շարունակում էին գործել: Իհարկե, երբեմն անհրաժեշտ էր լինում ուսանողներին տեղափոխել անվտանգ վայրեր: Ահաբեկիչներն օգտվում են նռնականետից կամ ինքնաշեն հրանոթներից, որոնց անվանում են «Դժոխային հրանոթ»: Դրանք գազի բալոններ են, որոնց մեջ մեխեր են լցված»,- պատմեց Բլանշարը:
Դամասկոսի ֆրանսիական հոսպիտալի վիրաբուժական բաժանմունքի ղեկավար Էլյաս Լաամն էլ պատմեց մի բան, որի մասին, ըստ նրա, ոչ ոք չի խոսում. կառավարական ուժերի ազդեցության գոտիներում ապրում են նաև ջիհադիստներ:
«Իմ այցելուների թվում են նաև ջիհադիստների ընտանիքներ: Նրանց տղամարդիկ մեկնում են կռվելու սիրիական զինուժի դեմ, իսկ ընտանիքներին թողնում են այստեղ, որվհետև գիտեն, որ անկախ ամեն ինչից` մենք բուժելու ենք նրանց»,- ասաց բժիշկը:
Զրուցակիցները խոսեցին նաև Հալեպ մատակարարվող սննդի ու ջրի մասին: Ճիշտ է, տարբեր կազմակերպություններ սնունդ են մատակարարում, բայց դա չի բավականացնում մարդկանց:
«Ապստամբները պարբերաբար փակում են Հալեպ մատակարարվող ջրի ճանապարհը: Ջուր ու հոսանք ունենալու համար մարդիկ կիրառում են իրենց ամբողջ հնարամտությունը:
Ամենանախաձռնողները գնել են հզոր գեներատորներ: Փողոցներում կախված են լարեր, դրանք գալիս են գեներատորից ու հոսանք մատակարարում տներին: Եթե տվյալ ընտանիքը քիչ գումար ունի, գնում է ընդամենը մեկ ամպեր և միայն լույս ունենում, իսկ ավելի ունևորները գնում են մի քանի ամպեր և հնարավորություն ստանում օգտվել նաև սառնարանից ու լվացքի մեքենայից»,- պատմեց Լաամը:
Նա խոսեց նաև այս իրավիճակում Ռուսաստանի տրամադրած հումանիտար օգնության մասին:
«Ռուսական կողմը հումանիտար աջակցություն է ցուցաբերել հատկապես Քեսաբի հայկական թաղամասին: Բայց տեսել ենք նաև հումանիտար օգնություն, որն ուղղվում է դեպի Հալեպ: Իհարկե, օգնությունը պետք է առաջին հերթին լինի այն, որ դուրս մղեն ջիհադիստներին երկրից»,- ասաց բժիշկ Լաամը:
Հիշեցնենք, որ սեպտեմբերի 30-ին ահաբեկիչները հրթիռակոծել են Հալեպ քաղաքը: Կան բազմաթիվ զոհեր, որոնց թվում է նաև 5 հայ:
Համացանցում հայտնվել էր մի տեսանյութ, որտեղ փրկարարը փլատակների տակից դուրս է բերում մեկ ամսական մի փոքրիկի: Նա սկսել է արտասվել, իսկ հետո լրատվամիջոցներին պատմել էր, որ ինքը երեխա չունի և այդ պահին իրեն զգացել է փոքրիկի հայրը:
Սիրիայում իրավիճակը շարունակում է մնալ լարված:
