ԵՐԵՎԱՆ, 30 սեպտեմբերի — Sputnik. Արամ Խաչատրյանի տուն-թանգարանի և Տորոնտոյում «L'Atelie Grigorian» խանութ-սրահի համագործակցության շնորհիվ Հայաստանին նվիրաբերվեց մեծ կոմպոզիտորի՝ մինչ այժմ մեզ անհայտ մոնումենտալ ստեղծագործությունը։
Այդ մասին Sputnik Արմենիա մամուլի կենտրոնում հայտնեցին Արամ Խաչատրյանի տուն-թանգարանի տնօրեն Արմինե Գրիգորյանը և Տորոնտոյում «L'Atelie Grigorian» խանութ-սրահի հիմնադիր-տնօրեն Հարմիկ Գրիգորյանը (Կանադա)։
Հարմիկ Գրիգորյանն ասաց, որ իր ձեռք բերած եզակի նմուշը հետաքրքիր պատմություն ունի։ Կոմպոզիտորն այն ստեղծել է կյանքի վերջին տարիներին (1975 թ.) Հունգարիայի նվագախմբի պատվերով, կոչվում է «Կանտատ պատերազմի հերոսներին»։
Գրված է սիմֆոնիկ նվագախմբի՝ արական երգչախմբի, սոպրանոյի և ասմունքողի համար, հունգարացի Գաբոր անունով պոետի բառերի հիման վրա։ Կանտատը նվիրվել է երկրորդ համաշխարհային պատերազմի ավարտի 30-ամյակին։
Ինքը՝ Արամ Խաչատրյանը, սեփական ստեղծագործության մասին գրել է.
«Իմ կանտատը ես նվիրում եմ բոլոր նրանց, ովքեր ապրել են պատերազմի սարսափը։ Թեև արդեն 30 տարի է անցել այն օրվանից, այդուամենայնիվ մենք հիշում ենք այդ ողբերգությունը, որն ապրել են աշխարհի ժողովուրդները մեծ համաշխարհային հրդեհում։ Ես ցանկանում եմ, որ այդ սարսափը չկրկնվի»։
1978 թվականին ւանտատը ձայնագրել է HUNGAROTON ընկերությունը։
Արմինե Գրիգորյանը նշեց, որ Հարմիկ Գրիգորյանի շնորհիվ Արամ Խաչատրյանի տուն-թանգարանը ձեռք բերեց կոմպոզիտորի հրաշալի ստեղծագործություններից մեկը, որը մեզ անհայտ էր, իսկ Հունգարիայում՝ շատ հայտնի ու սիրված։
Հարմիկի ջանքերով Խաչատրյանի անվան եռյակն առաջիկայում ելույթ կունենա Տորոնտոյի ամենաշքեղ սրահներից մեկում։
Դասական երաժշտության իր կենտրոնը Հարմիկ Գրիգորյանը հիմնադրել է 1980 թվականին, այն զբաղվում է CD-ների և DVD-ների վաճառքով, ինչպես նաև դասական երաժշտության տարածմամբ։
Կանադայի լավագույն գրադարաններն ու աշխարհի շատ երկրների հանրահայտ կազմակերպություններ գործակցում են հենց մեր հայրենակցի խանութ-սրահի հետ, քանի որ նրան հաջողվել է ստեղծել յուրահատուկ կենտրոն ու հավաքել լավագույնը համաշխարհային մեծության մարդկանց ստեղծագործություններից։
Արամ Խաչատրյանի անվան տուն-թանգարանի հետ համատեղ ծրագրերը շարունակելի բնույթ են կրում։
