ԵՐԵՎԱՆ, 29 սեպտեմբերի — Sputnik. ՀՀԿ ԳՄ նիստում այսօր կառավարության նոր նշանակումների հարց չի քննարկվել, այս մասին լրագրողներին ասաց ՀՀԿ խոսնակ Էդուարդ Շարմազանովը։
Նա հայտնեց, որ Հայաստանի նախագահը մինչև հոկտեմբերի 3-ը կնշանակի ԱԳ և պաշտպանության նախարարներին: Կփոխարինվեն նրանք նոր անձանցով, թե կվերանշանակվեն, Շարմազանովը չհստակեցրեց:
Ինչ վերաբերում է մարզպետների փոփոխությանը, Շարմազանովը չբացառեց` հիշեցնելով, որ նախագահն իր ելույթում նշել էր` փոփոխություններ լինելու են բոլոր պետական կառույցներում:
Շարմազանովը նաև տեղեկացրեց, որ նոյեմբերի 26-ին նախանշված է ՀՀԿ հերթական համագումար, որը, նրա որակմամբ, կրելու է «հաշվետու բնույթ»: Դրանից հետո ՀՀԿ-ն պատրաստվելու է 2017թ-ի խորհրդարանական ընտրություններին:
Իսկ թե որտեղ կլինի վարչապետ Կարեն Կարապետյանն ընտրությունների արդյունքում, Շարմազանովը նշեց. «Երբ մենք հաջողության կհասնենք, կուսակցության և հանրապետության նախագահ Սերժ Սարգսյանն արդեն կներկայացնի հանրապետության վարչապետին»:
Լրագրողների հարցին` սպասվու՞մ է արդյոք հոկտեմբերին Ադրբեջանի և Հայաստանի նախագահների հանդիպում, ՀՀԿ խոսնակն ասաց, որ այս պահին նման հանդիպում նախանշված չէ, և ՀՀԿ ԳՄ նիստում հարցը չի քննարկվել:
