ԵՐԵՎԱՆ, 29 սեպտեմբերի — Sputnik. Ազգային ժողովն այսօր 76 կողմ, 10 դեմ, 6 ձեռնպահ ձայներով հաստատեց կառավարության կառուցվածքի մասին օրենքում փոփոխություններ անելու նախագիծը, որով Էկոնոմիկայի նախարարությունն այսուհետ կկոչվի Ներդրումների և ձեռնարկատիրության աջակցության, Էներգետիկայի և բնական պաշարների նախարարությունը` Էներգետիկ ենթակառուցվածքների և բնական պաշարների, Կապի և տրանսպորտի նախարարությունը` Կապի և տեղեկատվական տեխնոլոգիաների նախարարություն:
Իսկ քաղաքաշինության նախարարությունն ընդհանրապես հանվեց կառավարության կազմից: Այս կառույցին առաջիկայում կտրվի կոմիտեի կարգավիճակ:
ԱԺ-ն այսօր հաստատեց նաև Հարկային նոր օրենսգրքի նախագիծը: Քվեարկությունից առաջ ընդդիմադիր շատ պատգամավորներ հայտարարեցին, որ օրենքն այս տեսքով չի կարող ընդունվել: ՕԵԿ-ը հայտարարեց, որ դեմ է քվեարկելու և մյուսներին ևս կոչ արեց դեմ քվեարկել:
Պատգամավոր Ռուբեն Հակոբյանը հայտարարեց, որ ինքն էլ չի մասնակցելու քվեարկությանը, քանի որ չի ցանկանում մասնակցել պարտադրված քվեարկության արմատացած ավանդույթին: Բայցևայնպես, նոր օրենսգիրքն ընդունվեց ձայների մեծամասնությամբ՝ 79 կողմ, 24 դեմ և 1 ձեռնպահ ձայներով:
