ԵՐԵՎԱՆ, 29 սեպտեմբերի — Sputnik. Հայ մարզիկները հաջորդ տարվա մարտին պատրաստվում են ելույթ ունենալ Լոս Անջելեսում կայանալիք 42 կմ պարալիմպիկ մարաթոնին, Sputnik Արմենիային ասաց Հայաստանի հաշմանդամների «Փյունիկ» միության նախագահ Հակոբ Աբրահամյանը։
«Եթե մեր մարզիկները մարզվեն 6-8 ամիս, նրանք պատրաստ կլինեն։ Մրցումներին կմասնակցի կամ մեկ պարալիմպիկ, կամ երկու` կախված նրանց մարզավիճակից», — նշեց Աբրահամյանը։ Դա կարող են լինել մարզիկներ Ալեքսան Բայանդուրյանն ու Արթուր Գրիգորյանը, ովքեր արդեն մասնակցել են նման մրցումների Սոչիում, Նյու Յորքում և Բեյրութում։ Սոչիում վերջին մրցումների ժամանակ հայ մարզիկները մասնակցեցին մարզական անվասայլակներով մրցումներին` ի աջակցություն Ռուսաստանի պարալիմպիկ շարժման։
Մրցումներին մասնակցեցին Հայաստանի, Ռուսաստանի, Ղազախստանի և Իսպանիայի պարալիմպիկ մարզիկները։
Աբրահամյանի խոսքով` ռուս մարզիկներն ավելի լավ էին պատրաստված և՛ ֆիզիկապես, և՛ տեխնիկապես, դրա համար հայերը հաղթանակներ չգրանցեցին։ Այս կապակցությամբ «Փյունիկ» միության ղեկավարը նշեց, որ ֆինանսավորման բացակայությունը թույլ չի տալիս Հայաստանին հարկ եղած ձևով հանդես գալ պարալիմպիկ մրցումների ժամանակ։
«Այժմ մենք տարբեր մրցաձևերում հանդես եկող մոտ քսան մարզիկ ունենք, որոնք կարող են մասնակցել միջազգային մրցումներին, եթե նրանց համապատասխան ֆինանսավորում հատկացվի նախապատրաստվելու համար», — ասաց Աբրահամյանը։
