Հայկական գելխեղդը կամ գամփռը հայկական լեռնաշխարհի աբորիգեն տեսակներից է և 2011 թվականին ճանաչվել է միջազգային կինոլոգիական միության կողմից (IKU)։
«Աշխարհում շատ քիչ աբորիգեն ցեղատեսակներ են մնացել։ Գամփռը դրանցից լավագույնն է։ Այդ շները շատ հավասարակշռված են։ Անկախ խոշոր չափերից` հայկական գելխեղդը մարդու հետ իրեն չափազանց հանգիստ է պահում», — ասաց Գաբրիելյանը։
Նրա խոսքով` Հայաստանի կինոլոգիական միությունը սկսել է համագործակցել ՊՆ-ի հետ, և այդ համագործակցության շրջանակում նախատեսում է գամփռին ներգրավել երկրի սահմանների պաշտպանության գործում։
«Խիստ ընտրություն է կատարվել, և այս պահին որոշ ձագեր արդեն պատրաստվում են ծառայություն անցնելու համար։ Եթե որևէ արտակարգ դեպք չլինի, ապա նոյեմբերին շներին արդեն սահման կուղարկեն», — նշեց Գաբրիելյանը։
Գամփռի ժայռապատկերներ են հայտնաբերվել Հայաստանի տարբեր մարզերում, որոնք վկայում են, որ այս ցեղատեսակն արդեն մի քանի հազար տարի հավատարմորեն ծառայում է մարդուն` իր բնավորությամբ և կարողություններով լինելով անգերազանցելի պաշտպան և պահակ։
