ԵՐԵՎԱՆ, 28 սեպտեմբերի — Sputnik. Հայաստանը հաստատել է իր մասնակցությունը «Մանկական Եվրատեսիլ- 2016» միջազգային երաժշտական մրցույթին, որը կմեկնարկի 2016թ-ի նոյեմբերի 20-ին Մալթայում։ Այս մասին հայտնում է rusarminfo-ն։
Հայաստանը մրցույթում կներկայացնեն 13-ամյա երգչուհիներ Մերի Վարդանյանը և Անահիտ Ադամյանը։
Հայաստանը «Մանկական եվրատեսիլ» երգի միջազգային մրցույթին մասնակցում է 2007 թվականից: 2010-ին Վլադիմիր Արզումանյանի գրանցած հաղթանակը հնարավորություն ընձեռեց մրցույթը 2011 թվականին հյուրընկալել Հայաստանում: «Մանկական եվրատեսիլ»-ն այս տարի կանցկացվի 14-րդ անգամ և կկայանա նոյեմբերի 20-ին Մալթայի մայրաքաղաք Վալետտայում։
13-ամյա Անահիտ Ադամյանը ծնվել է Սոչի քաղաքում, մանկուց սիրում է երգել, իսկ երաժշտական առաջին պրոֆեսիոնալ քայլերը սկսել է 2013-ից, ուսանել նաև Հայաստանում: Իսկ Մերի Վարդանյանը, որը նույնպես 13 տարեկան է, ծնվել է Գեղարքունիքի Վարդենիս քաղաքում: Երաժշտությունում առաջին լուրջ քայլերն արել է 2011 թվականից և սկսել է ուսանել «ԷՄԻ-ԲԻ» պրոդյուսերական ընկերության «Դո-Ռե-Մի» վոկալ դպրոցում:
Մրցութային երգը կներկայացվի վաղ աշնանը:
