ԵՐԵՎԱՆ, 28 սեպտեմբերի — Sputnik. Նոր վարչապետի փորձաքարը հարկային օրենսգիրքն է, համոզված է քաղտեխնոլոգ Կարեն Քոչարյանը, քանի որ հենց հարկային օրենքով են արձակվելու ու կամ ամրանալու գործարարներին կաշկանդող օրենսդրական շղթաները։
Վարչապետ Կարեն Կարապետյանի համար հնարավորություն է ստեղծվում այդ օրենքի շտկմամբ նպաստել տնտեսության զարգացմանը։
Կարեն Քոչարյանը մեջբերեց Վրաստանի օրինակը, որտեղ շահութահարկը հանելու հարցն են քննարկում։
Դրանից հետո ցանկացած գործարար կգերադասի մի քանի հարյուր կմ հեռավորության վրա՝ օտար երկրում, ներդրում կատարել, ոչ թե խեղդվել սեփական պետության հարկային կապանքների ճիրանում և սնանկանալ։
Ինչ վերաբերում է հնով հագեցած կառավարության նոր կազմին, Կարեն Քոչարյանը ողջունեց նոր դեմքերի առկայությունը. նոր նախարարները լավ մենեջմենթ գիտեն և խոստումնալից կառավարիչներ են։
«Ճահճացած վիճակ էր, անընդմեջ դեժավյուի մեջ էինք՝ նույն մառազմատիկ դեմքերը տեսնելով, այս փոփոխությունները խիստ անհրաժեշտ էին»,- ասաց Կարեն Քոչարյանը։
Կառավարության նոր դեմքերին անդրադարձավ նաև հոգեբան Ռուբեն Աղուզումցյանը, հավատացնելով, որ նրանք ի զորու են դրական տեղաշարժ կատարել երկրում։
Հոգեբանը նշեց, որ կառավարիչը նախևառաջ պետք է սիրի մարդկանց, որոնց ղեկավարում է. դա է ճիշտ կառավարելու առաջին պայմանը։
«Սոսկ մասնագիտությանը տիրապետելը բավարար չէ, ղեկավարին բարոյական ու ոգեղեն հատկություններ են անհրաժեշտ, նաև՝ հոգեբանական գիտելիքներ, միայն այդ դեպքում կառավարիչը լիարժեք կտիրապետի մարդու հետ գործ ունենալու հմտություններին։ Կառավարումը չի ենթադրում ճնշել, այլ նշանակում է՝ օգնել»,- ասաց Ռուբեն Աղուզումցյանը։
Նա նկատեց, որ մեր իրականությունը հակառակն է, ենթակային անտեսում են, մինչդեռ կայացած ղեկավարը իր իսկ գործի հաջողության համար անհրաժեշտ է, որ աջակցի աշխատակցին։
Նոր նախարարներից շատերին է ճանաչում հոգեբանը, նրանց համարում է ինտելեկտուալ դեմքեր և կարծում է, որ լիովին համապատասխանում են պաշտոնին։
Կարեն Կարապետյանը կադրային ճիշտ քաղաքականություն է վարում, որը կհանգեցնի տեսանելի դրական փոփոխությունների. այդպիսին է հոգեբանի և քաղտեխնոլոգի եզրակացությունը։
