ԵՐԵՎԱՆ, 28 սեպտեմբերի — Sputnik. Պրոֆեսոր Դմիտրի Պուշկարը Երևանում մասնակցել է Հայկական ուրոլոգիական ասոցիացիայի համագումարի աշխատանքին։ Նրա խոսքով` այսօր բժշկության մեջ լայնորեն կիրառվում են ռոբոտ-ասիստացված տեխնոլոգիաները` սկսած ներարկումներից և անալիզներ վերցնելուց մինչև բարդ վիրահատական միջամտություն։
Պուշկարի մասնակցությունը հայկական միջազգային կազմակերպության աշխատանքին պայմանավորված է եղել այն հանգամանքով, որ նա հայկական արմատներ ունի. մորական կողմի նախնիները հայեր են և բնակվել են Դաղստանի Կիզլյար քաղաքում։
«Օրդինատուրայում սովորելու տարիներին հաճախել եմ լեզվի կենտրոն, որը գործում էր Մոսկվայում Հայաստանի դիվանագիտական ներկայացուցչությանն առընթեր։ Մինչև հիմա էլ կարող եմ հայերեն շփվել կենցաղային մակարդակով»,- ասաց Պուշկարը։
Նա երևանյան համագումարում զեկույց է ներկայացրել «Ուրոլոգիայում ռոբոտ-ասիստացված վիրահատություն» թեմայով։ Պուշկարը պարզաբանեց, որ հենց ռոբոտը վիրաբուժական վիրահատություններ չի կատարում։ Դա գործիք է, որը կառավարում է մարդը։
«Մենք կառավարում ենք սարքերը, որոնք կազմակերպում ենք փոքրիկ գործիքների ղեկավարումը»,- ասաց Պուշկարը։
Նրա խոսքով` այսօր ԱՄՆ-ում կա 4 հազար բժշկական ռոբոտ, Ճապոնիայում և Գերմանիայում` 400 ռոբոտ, իսկ Ռուսաստանում` 25։ Պուշկարի կարծիքով` քանի որ Հայաստանում կա ռեզիդենտուրա, և ուրոլոգների նախապատրաստումն իրականացվում է բոլոր միջազգային չափանիշներով, ապա հանրապետությունում ռոբոտ-ասիստացված վիրահատությունների անցկացումը կարող է մոտ ապագայում իրականություն դառնալ։
