ԵՐԵՎԱՆ, 28 սեպտեմբերի — Sputnik, Գոհար Սարգսյան. Այն կայքերը, որոնք տեղադրել էին մեջտեղից կիսված շիրմաքարի լուսանկարն ու գրել, թե շիրմաքարը պղծվել է, այսօր արդեն ջնջել են այդ լուսանկարը։
«Եռաբլուր» զինվորական պանթեոնի տնօրեն Սուրեն Խաչատրյանը պատմեց, թե ինչ է տեղի ունեցել իրականում։ «Մայիսի 23-ին ուժեղ քամիներ էին ամբողջ հանրապետության տարածքում, որի հետևանքով տեղի ունեցան ավերածություններ, ինչը հասավ նաև «Եռաբլուր» պանթեոնին, և զոհված ազատամարտիկների 4 շիրմաքար կոտրվեց»,- ասաց Խաչատրյանը։
Նրա խոսքով` քարի տակ գտնվող ամրաններից մեկը կոտրվել էր, քարն ընկել էր դրանց վրա ու ճաք տվել։
«Ականատեսներ են եղել, քարը ցցի վրայից ծռվել ու ընկել է, մասնագետները նայել են, գիտեն։ Մենք տեղեկացրել ենք ՊՆ վարչություններից մեկին։ Եկան, նշեցին, որ վերականգնեն սխալը»,-ասաց Խաչատրյանը։
Նա պատմեց նաև, որ այդ ընթացքում 17 տարեկան մի երիտասարդ եկել ու տեսել է քարը կոտրված վիճակում, լուսանկարել է ու անմիջապես տեղադրել համացանցում։ Լրատվական որոշ կայքեր էլ, ըստ նրա, անմիջապես վերցրել են ու լուսանկարների վրա սկանդալային նյութ կառուցել։
«Կայքերը վերցնում են ու անմիջապես վերնագիր դնում, որ վանդալիզմ է տեղի ունեցել։ Բացատրություն գրեցինք, թե ինչ է տեղի ունեցել։ Նույնիսկ ազատամարտիկի տղան եկավ մեզ մոտ, զայրացած ու կոպիտ արտահայտվեց, թե ինչու են նման բաներ գրել։ Հերոսը զոհվել է 1997 թվականին, տղան ասում է` իմ հայրն ի՞նչ է արել, որ ջարդեին շիրմաքարը, կամ ինչու՞ պետք է հերոսի նկարը ջարդեն»,-ասաց «Եռաբլուր» պանթեոնի տնօրենը։
Նա չթաքցրեց, որ, այնուամենայնիվ, վատ տեղադրված քար է եղել։ Իսկ տեղադրողը ոչ թե պաշտպանական գերատեսչությունն է, այլ` հերոսի ընտանիքը։ Այս պահին նախարարությունը նախաձեռնել է վերականգնել շիրմաքարը, այդ թվում նաև` վնասված մյուս 3 քարերը։ Նա ավելացրեց, որ «Եռաբլուրում» նախատեսվում է լայնածավալ վերականգնողական ծրագիր իրականացնել։ Շիրմաքարի վերականգնումը ևս կլինի այդ ծրագրի շրջանակում։
Մայիսի 23-ից անցել է մի քանի ամիս, սակայն քարը վերականգնելու կամ նորը տեղադրելու տեսանելի քայլ դեռ չկա։
