ԵՐԵՎԱՆ, 26 սեպտեմբերի — Sputnik. Հայ պարալիմպիականները կմասնակցեն սայլակներով մրցավազքի, որը տեղի կունենա սեպտեմբերի 28-ին «Ֆորմուլա 1»-ի մրցուղում, Sputnik Արմենիային հայտնեց Հայաստանի հաշմանդամների «Փյունիկ» միության նախագահ Հակոբ Աբրահամյանը։
Նրա խոսքով` մրցումներին կմասնակցեն մարզիկներ Հայաստանից, Ռուսաստանից, Ղազախստանից և Իսպանիայից։
«Հայ մարզիկները կմասնակցեն մրցավազքին ճանապարհի 22-րդ կիլոմետր հատվածում։ Պատվիրակության կազմում ընդգրկված են Գոհար Նավասարդյանը, Ալեքսան Բայանդուրյանը, Սմբատ Կարապետյանը, Արթուր Գրիգորյանը», — նշեց Աբրահամյանը։
Նրա խոսքով` մեր երկու մարզիկները` Բայանդուրյանը և Գրիգորյանը, Նյու Յորքում և Բեյրութում մասնակցել են նման մրցումների։ Հայկական պատվիրակության մասնակցության նպատակն է աջակցել Ռուսաստանի պարալիմպիկ շարժմանը, որը ճնշման տակ է հայտնվել ։
Միջազգային պարալիմպիկ կոմիտեն (IPC) Ռուսաստանի հավաքականին հեռացրել է 2016-ի Պարալիմպիկ խաղերից, որն անցկացվել է Ռիոյում սեպտեմբերի 7-18-ը։
