ԵՐԵՎԱՆ, 26 սեպտեմբերի — Sputnik. Այսօրվանից սկսած մայրաքաղաքի փողոցները քայլ առ քայլ տոնական տեսք կստանան։ Շենքերը, կամուրջներն ու նույնիսկ տրանսպորտային միջոցները կարմիր, ծիրանագույն և դեղին հանդերձանք «կհագնեն»։ Մայրաքաղաքի տոնական տեսքը կամբողջանա հոկտեմբերի 8-ին, երբ կսկսվեն ուրախ միջոցառումները։
Այս տարի միջոցառումների անցկացման համար տրամադրվող բյուջետային միջոցներն ավելի համեստ են։
«Դեռևս մայիսին Երևանի քաղաքապետն իր լիազորությունների շրջանակում 2016 թվականի համար նախատեսված բյուջեում իրականացրեց մասնակի փոփոխություններ` հաշվի առնելով ապրիլյան պատերազմում տեղի ունեցածը, ֆինանսական օժանդակություն ուղղվեց դեպի մեր հաշմանդամ, զոհված և վիրավորված ազատամարտիկների ընտանիքները»,-ասաց Երևանի փոխքաղաքապետ Արամ Սուքիասյանը։
Ըստ այդմ, նախատեսված 130 միլիոն դրամի փոխարեն միջոցառումների համար ծախսել 65 միլիոն դրամ։ Օրակարգից կհանվեն ամենածախսատար միջոցառումները։ Արամ Սուքիասյանը թվարկեց դրանցից մի քանիսը։
«Մասնավորապես, կհանվի Հանրապետության հրապարակում անցկացվող գալա–համերգը, շքերթը, որը սովորաբար մեկնարկում էր Երևանի քաղաքապետարանի դիմացից և շարունակվում Ամիրյան փողոցով դեպի հրապարակ։ Կեսօրին առանձին միջոցառում էր լինում Հանրապետության հրապարակում, ինչպես նաև Երևանի քաղաքապետարանի դիմաց։ Այս միջոցառումները նույնպես հանվել են այս տարվա ցանկից»,-ասաց նա։
Սուքիասյանը տեղեկացրեց նաև, որ այս տարի փողոցները հիմնականում բաց կլինեն։ Փակ կլինեն միայն Աբովյան փողոցը` Թումանյան խաչմերուկից մինչև Հանրապետության հրապարակ, Էրեբունի փողոցը` մինչև թանգարան։
«Այնուամենայնիվ 34 անուն միջոցառում կա։ Հիմնական հարթակներում, հրապարակներում, բացօթյա հատվածներում կունենանք ավանդական դարձած միջոցառումներ, կհնչի ռոք, ջազ, էթնո երաժշտություն։ Գարեգին Նժդեհի արձանի հարևանությամբ կտեղադրվի բեմահարթակ, սկզբում ազգային փոքրամասնությունները հանդես կգան իրենց էթնո մշակույթով, հետո ներկաները կվայելեն հայկական մեղեդիներ»,-ասաց Սուքիասյանը։
Երևանի քաղաքապետարանի սոցիալական ապահովության վարչության պետ Ռուզաննա Զաքարյանն էլ տեղեկացրեց, որ նշյալ միջոցառումներին զուգահեռ կիրականացվեն սոցիալական աջակցության ծրագրեր։ Քաղաքապետարանի աշխատակիցները կայցելեն 2798 ընտանիք ու նվերներ կհանձնեն նրանց։
«Վաղվանից աշխատակիցները կայցելեն այդ ընտանիքներ, կշնորհավորեն, մայրաքաղաքի արևոտ սրտից նրանց ջերմություն կպարգևեն ու կհանձնեն նվերները։ Նպատակը Երևանի բնակիչների հանդեպ հոգածություն ցուցաբերելն է»,-ասաց նա։
Քանի որ հոկտեմբերի 1-ը տարեցների միջազգային օրն է, ուշադրություն կհրավիրվի նաև նրանց ուղղությամբ։ Երևանում կա 19 տարեց մարդ, որոնց տարիքն անցել է 100-ը։ Հատուկ այցելություններ կլինեն նաև նրանց տներ։
