ԵՐԵՎԱՆ, 23 սեպտեմբերի — Sputnik. Երևանի, Գյումրու և Ուջան գյուղի կինոսերները վավերագրական ֆիլմի փառատոնի շրջանակում կկարողանան աշխարհի 22 երկրի 35 ֆիլմ դիտել։
«Փառատոնին մասնակցելու համար հայտ էինք ստացել աշխարհի 40 երկրից`Ավստրալիայից մինչև Մեքսիկա։ 200 ֆիլմի հայտ էր ուղարկվել, բայց մենք ընտրեցինք լավագույնները` 35 ֆիլմ 22 երկրից», — Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ ասաց փառատոնի հիմնադիր-տնօրեն, կինոգետ, կինոռեժիսոր Գարեգին Զաքոյանը։
Նրա խոսքով` փառատոնը նեղ մասնագիտական է և սահմանափակվում է վավերագրական էթնոգրաֆիկ և անտրոպոլոգիական ֆիլմերով։
Զաքոյանը նշեց, որ փառատոնը չի սահմանափակվի մայրաքաղաքով։ Հիմնական միջոցառումները, ֆիլմերի ցուցադրությունները կանցկացվեն Գյումրիում, որտեղ կկայանա նաև պարգևատրման արարողությունը։
Ֆիլմերը պատմում են առօրյա հոգսեր ունեցող մարդկանց, ազգային առանձնահատկությունների և կոլորիտի մասին։
Նա կարծում է, որ փառատոնի համար ընտրված բոլոր ֆիլմերը կարելի է հաղթող անվանել, քանի որ խիստ ընտրություն է կատարվել։
Երևանում և Գյումրիում կանցկացվեն նաև վարպետության դասեր, իսկ Ուջան գյուղում, բացի համերգից, հյուրերի համար լավաշ կթխեն և կծանոթացնեն գյուղացիների կենսակերպին։
Փառատոնի նպատակն է զարգացնել վավերագրական ժանրը, որը կազմակերպիչների կարծիքով` հայկական ֆիլմարտադրության կարևոր ուղղություններից է։
Այս տարի, ինչպես և անցյալ տարի, փառատոնի շրջանակում կանցկացվի «Ծիրանի ծառ» գիտաժողովը։
