ԵՐԵՎԱՆ, 22 սեպտեմբերի — Sputnik. Տրանսպորտի և կապի նախարար Վահան Մարտիրոսյանն անկեղծորեն հայտնեց, որ լրագրողների օգնության կարիքն ունի` բան նկատեն, միասին աշխատեն։ Sputnik Արմենիայի հարցին, թե ինչ համակարգային փոփոխություններ է պատրաստվում անել, հաշվի առնելով նաև այն հանգամանքը, որ վարչապետը երկիրը փոխելու հնարավորություն է տվել, Արամյանը պատասխանեց, որ դեռ չի կարող հայտնել։
«Ծրագիրը կներկայացնեմ, հիմա չեմ կարող ասել, շատ բաներ կան, որ քննարկման փուլում են։ Մի քանի ժամ է, ինչ աշխատում եմ. կուսումնասիրեմ, կասեմ»,-ասաց տրանսպորտի և կապի նախարարը։
Լրագրողների մեկի այն հարցին, թե արդյո՞ք Կարեն Կարապետյանի հետ ընկերությունն է օգնել նրան դառնալ նախարար, Արամյանը բացասական պատասխան տվեց։
«Ոչ։ Ես նորմալ հարաբերություններ ունեմ Կարեն Կարապետյանի հետ»,-ասաց նախարարը։
Էներգետիկայի և բնական պաշարների նախարար Աշոտ Մանուկյանն էլ արդեն ներկայացրեց իր համար առանձնացված 3 ռազմավարական ուղիները։
«Առաջինը ատոմակայանի արդիականացման ծրագիրն է։ Երկրորդը վերաբերում է ընդերքի համալիր հետազոտությանը և մյուսը`ավելի արդիական և ժամանակակից արտադրող հզորությունների գործարկմանը»,-ասաց Մանուկյանը։
Ֆինանսների նորանշանակ նախարար Վարդան Արամյանն էլ աշխատանքը սկսելիս այլ հիմքեր է գցում. հանձնարարելու է լրատվամիջոցների ու հանրության հետ հաղորդակցվելու հատուկ ձևաչափ ունենալ։ Նա խնդրեց նաև հարցեր չտալ նախորդ նախարարի աշխատանքի վերաբերյալ։
«Սխալ է` անցածի մասին գնահատականներ տանք, վաղը չէ մյուս օրը ես կարող եմ փոխվել։ Եթե ինձ փոխարինողը սկսի խոսել իմ արած-չարածի մասին, մենք հիմնական գործից կշեղվենք դեպի բամբասանք։ Եկեք իդենտիֆիկացնենք խնդիրները, գործիքակազմը և մտածենք ինչպես ենք հասնելու դրան։ Դա լինի թափանցիկ»,-ասաց նախարարը։
Ինչ վերաբերում է կառավարության նիստի ժամանակ վարչապետի հնչեցրած «պրիմիտիվ գողությունների» մասին արտահայտությանը, ֆինանասների նախարարը պատասխանեց, որ աշխարհում նմանատիպ խնդիրներ ու խեղումներ պատահում են։ Նրա խոսքով, այս դիտողությունը դրոշակ է բարձրացնում, որ ուշադրություն դարձնենք այդ խնդիրների վրա ու արագ լուծումներ գտնենք։
