ԵՐԵՎԱՆ, 22 սեպտեմբերի — Sputnik. Ֆինանսների նորանշանակ նախարար Վարդան Արամյանը, վարչապետի կարծիքով, լավ է տիրապետում իր գործին։ Նույնն ասաց նաև մյուս երեք նախարարների մասին
«Նախարարները համեստ և պարկեշտ մարդիկ են, կառավարման նոր մշակույթի կրողներ։ Շնորհավորում եմ և շնորհակալ եմ, որ համաձայնեցիք դառնալ մեր թիմի անդամը։ Դուք ունեք ձեր երազած ոլորտը կառուցելու և երկիրը փոխելու հնարավորություն»,- ասաց վարչապետ Կարապետյանը։
Վերջում վարչապետը գյուղատնտեսության նորանշանակ նախարար Իգնատի Առաքելյանին տեղեկացրեց, որ Հայաստանում ամեն տարի խաղողի մթերման խնդիր է առաջանում։ Վարչապետին թվում է, որ ունենք ժանգոտած կառավարման համակարգ, ինչի մասին խոստացավ դեռ խոսել։
Նշենք, որ սեպտեմբերի 20-ին ՀՀ նախագահի հրամանագրերով մի քանի նախարարներ ազատվել են պաշտոնից և նրանց փոխարինելու են եկել նորերը։ Մասնավորապես Աշոտ Մանուկյանը նշանակվել է ՀՀ էներգետիկայի և բնական պաշարների նախարարի պաշտոնում, Իգնատի Առաքելյանը` ՀՀ գյուղատնտեսության նախարարի, Վահան Մարտիրոսյանը` ՀՀ տրանսպորտի և կապի նախարարի, Վարդան Արամյանը` ՀՀ ֆինանսների նախարարի պաշտոնում:
Աշոտ Մանուկյանը կփոխարինի Լևոն Յոլյանին, Իգնատի Առաքելյանը` Սերգո Կարապետյանին, Վահան Մարտիրոսյանը` Գագիկ Բեգլարյանին, իսկ Վարդան Արամյանը` Գագիկ Խաչատրյանին։
