ԵՐԵՎԱՆ, 22 սեպտեմբերի — Sputnik. Ամանորի տոներին Երևան չվերթեր իրականացնող ավիաընկերություններն ավելացնում են իրենց չվերթերի հաճախականություններն ու ուղղությունները:
«Արմենիա Միջազգային Օդանավակայաններ» ընկերությունն ուսումնասիրել է, թե հատկապես որ ուղղություններն են պահանջարկ վայելում հայաստանցիների շրջանում և ինչ կարժենան այդ ուղղությունների ավիատոմսերի գները 2016թ. դեկտեմբերի 27-ից մինչև 2017թ. հունվարի 15-ն ընկած ժամանակահատվածում:
Այսպես, դեպի Բարսելոն երկկողմանի տոմսը կարժենա 362 դոլար: Համեմատության համար ասենք, որ այս պահին նույն տոմսն արժե շուրջ 480 դոլար: Հռոմի տոմսը կարժենա 301 դոլար՝ ներկայիս 490 դոլարի փոխարեն, Փարիզինը՝ 373, ներկայիս 440-ի փոխարեն, Վիեննայինը՝ 296, ներկայիս 450-ի փոխարեն, Աթենքինը՝ 356՝ 700-ի փոխարեն, Լոնդոնինը՝ 442՝ 590-ի փոխարեն, Պրահայինը՝ 349՝ 490-ի փոխարեն, Լոս Անջելեսինը՝ 747 դոլար՝ 1029-ի փոխարեն, Նյու Յորքինը՝ 536՝ 580-ի փոխարեն, Պեկինինը՝ 359՝ 673-ի փոխարեն, Դուբայինը՝ 275 դոլար, ներկայիս 359 դոլարի փոխարեն:
Հավելենք, որ այս գներով ավիատոմսեր ձեռք բերելու համար անհրաժեշտ է դրանք ամրագրել սեպտեմբերի ընթացքում, քանի որ Ամանորի տոներին մոտ դրանք շատ ավելի թանկ կլինեն:
Ամանորը արտերկրում դիմավորելու միտքը թեև գայթակղիչ է, բայց հայերիս համար, պարզվում է, տանը մնալու միտքն ավելի ընդունելի է:
Պարզելու համար, թե մեր հայրենակիցներն ինչպես են պատկերացնում Ամանորի արձակուրդը, Sputnik Արմենիան փոքրիկ հարցախույզ կատարեց: Հարցման մասնակիցներից մեկն Ամանորն ընդհանրապես չի սիրում և չի ընկալում որպես տոն, բայց և չէր էլ ցանկանա դրա առիթով մեկնել այլ երկիր: 4-ը Նոր Տարին ընդունում են զուտ որպես ընտանեկան տոն և նույնիսկ բավարար ֆինանսական ապահովության դեպքում չէին ցանկանա նշել այն հայրենիքից ու ընտանեկան օջախից հեռու:
Հարցման 5 մասնակիցները բոլորն էլ ցանկություն հայտնեցին Նոր տարին արտասահմանյան այս կամ այն երկրում անցկացնել, եթե, իհարկե, հնարավորությունները թույլ տան: Ընդ որում, տոմսերի էժանացման ցանկալի սահմանը մեր զրուցակիցների համար 30-80%-ն է, իսկ ցանկալի ուղղությունները՝ Թաիլանդը, Դուբայը, Ամստերդամը, Լոնդոնը, Նյու Յորքը:
