ԵՐԵՎԱՆ, 22 սեպտեմբերի — Sputnik. Հիմնական գաղափարն այն է, որ Հայաստանի ներկան հետխորհրդային սերնդի ձեռքում է։ Անկախ երկրում ծնված երեխաները բոլորովին այլ կերպ են ընկալում հայրենիք գաղափարը։
Ամսագիրը ներառել է անկախության տարիների 25 կարևորագույն իրադարձություններն ու ձեռքբերումները։ Դրանցից ամենանշանակալիներն են ազգային մարտունակ բանակի ստեղծումը, Հայոց ցեղասպանության 100-րդ տարելիցին նվիրված միջոցառումները, Հյուսիսային պողոտայի շինարարությունը, 32-րդ շախմատային օլիմպիադան, 2007թ-ին Վլադիմիր Արզումանյանի հաղթանակը «Մանկական Եվրատեսիլ» երգի մրցույթում։
Բացի այդ, «Երևան» ամսագրի վարկածով նշանակալի ձեռքբերում է համարվում դասական հայ գրականության թվային գրադարանի ստեղծումը, Արենիի քարանձավներում անցկացված պեղումները, նորարարական դպրոցների բացումը, «ՏաԹևեր» ճոպանուղու կառուցումը, Հայաստանի հաղթանակը 2012թ-ին Ստամբուլի Շախմատային օլիմպիադայում, քաղաքացիական հասարակության ձևավորումը և այլն։
«Ամսագիրը լույս է տեսնում հատուկ թողարկման ձևաչափով, վերջին համարը նվիրված է եղել Հայրենական մեծ պատերազմում տարած հաղթանակի 70-ամյակին։ Այսօրվա համարն էլ նվիրված է Հայաստանի անկախության 25-ամյակին»,- ասաց ամսագրի գլխավոր խմբագիր Աննա Լորենցը։
Նրա խոսքով` այս անգամ թիմը փորձել է հատկապես ազնիվ լինել թե՛ իր, թե՛ ընթերցողի հետ։
«Սա Հայաստանի ծննդյան օրն է, ուստի զրույցը պետք է դրական լինի։ Մենք մեզ համար պարզել ենք, որ այս 25 տարվա ընթացքում շատ լավ իրադարձություններ են եղել։ Անկախություն ձեռք բերելուց հետո մեզ թվում էր, որ դա ինքնանպատակ է։ Այսօր` 25 տարի անց, կարծում եմ, որ մենք բոլորս հասկացել են, որ անկախությունը հնարավորություն է, որը մենք պետք է օգտագործենք»,- ասաց Լորենցը։
Նա նաև նշեց, որ ավագ սերունդը կարողացել է երիտասարդների փայլուն սերունդ մեծացնել, որոնք այս տարվա ապրիլին ապացուցեցին, թե ինչ է իրենց համար նշանակում հայրենիքը։ Լորենցը կարծում է, որ խորհրդային տարիներին ծնված սերնդի համեմատ նրանք բոլորովին այլ մարդիկ են, քանի որ ծնվել են անկախ Հայաստանում, և անկախությունը նրանց համար այլընտրանք չունի։
